ეკონომიკის განვითარების კორპორაციამ თავი უნდა აარიდოს ბანკებთან კონკურენციას და ფისკალური რისკების შექმნას - IMF

საერთაშორისო სავალუტო ფონდი მიიჩნევს, რომ საქართველოს მთავრობის მიერ ახლახან შექმნილმა ეკონომიკის განვითარების კორპორაციამ თავი უნდა აარიდოს საკუთარი საქმიანობით კომერციულ ბანკებთან კონკურენციაში შესვლას და ფისკალური რისკების წარმოშობას - ამის შესახებ აღნიშნულია ფონდის მიერ საქართველოს ეკონომიკასთან დაკავშირებით მომზადებულ 63-გვერდიან მიმოხილვაში.

საერთაშორისო სავალუტო ფონდი მიუთითებს, რომ სახელმწიფო საწარმოების სექტორში ერთ-ერთი ყველაზე დიდი ცვლილება სწორედ საქართველოს განვითარების კორპორაციის დაფუძნება იყო, რომელიც ყოფილი “აწარმოე საქართველოში”-ს და უკვე გაუქმებული “საქართველოს განვითარების ფონდის” შერწყმით შეიქმნა. IMF-ი აღნიშნავს, რომ ახალი კორპორაცია უნდა ფოკუსირდეს ბიზნესისთვის საკრედიტო დაფინანსების ხელმისაწვდომობის ზრდაზე, თუმცა აღნიშნული უნდა განახორციელოს ისე, რომ აღნიშნულით ცენტრალური მთავრობისთვის არ შექმნას ფისკალური რისკები და ამავდროულად არ მოახდინოს ბაზრიდან კერძო საკრედიტო დაფინანსების გამოდევნა და ბანკებთან კონკურენციაში შესვლა.

“ახლახან შექმნილმა „საქართველოს ეკონომიკური განვითარების კორპორაციამ“, რომელიც საერთო სამთავრობო სექტორში შედის და აერთიანებს „აწარმოე საქართველოში“-სა და „საქართველოს განვითარების ფონდს“, ყურადღება უნდა გაამახვილოს ბიზნესის ფინანსებზე ხელმისაწვდომობის კუთხით არსებული ბაზრის ხარვეზების აღმოფხვრაზე; ამასთანავე, მან თავი უნდა აარიდოს კომერციული ბანკების ბაზრიდან გამოდევნასა (კონკურენციის შეზღუდვასა) და ფისკალური რისკების შექმნას,”- ნათქვამია IMF-ის დოკუმენტში.

სავალუტო ფონდი ასევე მიუთითებს, რომ ამ საკითხთან დაკავშირებით საქართველოს ხელისუფლების წარმომადგენლების მხრიდან იყო დაფიქსირებული პოზიცია, რომ ამ კორპორაციის ფისკალურ რისკებს ფინანსთა სამინისტრო ეფექტიანად გააკონტროლებს და საჭიროების შემთხვევაში ვეტოს უფლებასაც გამოიყენებს.

“რისკები განვითარების ახალი კორპორაციიდან არის შეზღუდული ფინანსთა სამინისტროს საზედამხედველო უფლებამოსილებების გაძლიერებით, მათ შორის ძირითად გადაწყვეტილებებზე სამინისტროს ვეტოს უფლებით,”- წერს სავალუტო ფონდი.