"ეკონომიკის განვითარების კორპორაციისთვის" ფინანსებს სხვადასხვა წყაროდან მოვიძიებთ - კობახიძე

ირაკლი კობახიძის განცხადებით, ახალჩამოყალიბებული ეკონომიკის განვითარების კორპორაციისთვის ფინანსური რესურსები სხვადასხვა წყაროდან იქნება მოძიებული. ამის შესახებ მან bm.ge-ის კითხვის პასუხად განაცხადა.

პრემიერის თქმით, კორპორაციის ფინანსური რესურსების ნაწილი იქნება საბიუჯეტო, თუმცა იქნება სხვა წყაროებიც, მათ შორის საინვესტიციო.

„მთლიანობაში ბევრად უფრო კომპლექსური იქნება იმ კორპორაციის მუშაობა, რომელიც ახლა შეიქმნა. თქვენ იცით, რომ გაერთიანდა რამდენიმე სტრუქტურა, მათ შორის „აწარმოე საქართველოში“ და ყოფილი ფონდი, დაემატება ახალი მიმართულებები, ახალი მომსახურებები, შესაბამისად, კომპლექსურად იქნება ხელშეწყობილი ამ კორპორაციის მუშაობით საინვესტიციო პოლიტიკის წარმატებით წარმოება ჩვენს ქვეყანაში“, - განაცხადა კობახიძემ.

ცნობისთვის,“საქართველოს ეკონომიკური განვითარების კორპორაცია” საქართველოს მთავრობის გადაწყვეტილებით შეიქმნა, რომელმაც ყოფილი საპარტნიორო ფონდი და სააგენტო “აწარმოე საქართველოში” გააერთიანა. მის გენერალურ დირექტორად ირაკლი გაბრიაძე დაინიშნა.

მთავრობის განცხადებების თანახმად, 2026 წლის განმავლობაში სს "ეკონომიკის განვითარების კორპორაცია" დაფინანსებას მიიღებს ბიუჯეტის იმავე მუხლიდან, რომლითაც ეკონომიკის სამინისტრო სსიპ "აწარმოე საქართველოში"-ს აფინანსებდა, რაც 232.7 მილიონ ლარს შეადგენდა, ჯერჯერობით კორპორაციის ბიუჯეტის კორექტირების შესახებ ან მისთვის ახალი პროგრამების დამატების შესახებ მთავრობის მხრიდან ახალი ბრძანების ან განკარგულების გამოცემა არ მომხდარა.