ელექტროენერგიის წყვეტის სიხშირის გაუარესებისთვის სემეკმა „ენერგო პრო" დააჯარიმა

საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ) სს „ენერგო პრო ჯორჯია“ სალიცენზიო პირობების შეუსრულებლობის გამო, სახელმწიფო ბიუჯეტის სასარგებლოდ, დააჯარიმა.

კერძოდ, სემეკის ინფორმაციით, ელექტროენერგეტიკის დეპარტამენტის კვლევის შედეგად გამოვლინდა, რომ 2025 წელს, 2024 წელთან შედარებით გაუარესდა ერთ მომხმარებელზე ელექტროენერგიით მომარაგების წყვეტის საშუალო სიხშირის (SAIFI) მაჩვენებლები.

"კომისიის გადაწყვეტილებით, ელექტროენერგიით მომარაგების საიმედოობის 2025 წლის მაჩვენებლების გაუარესება 2024 წლის მაჩვენებლებთან შედარებით მიჩნეულ იქნა სემეკის მიერ დამტკიცებული ნორმატიული აქტისა და სალიცენზიო პირობების დარღვევად, რის გამოც, კომპანიას ფულადი ჯარიმა დაეკისრა", - აღნიშნულია სემეკის მიერ გავრცელებულ ინფორმაციაში.

გავრცელებულ ინფორმაციაში ჯარიმის ოდენობა დაკონკრეტებული არაა. BM.GE სემეკს დაუკავშირდა და ელოდება ინფორმაციას, თუ რა ოდენობის თანხით დაჯარიმდა კომპანია.