
ელისო კილაძეს 10-წლიანი პატიმრობა მიესაჯა
ჟურნალისტ ელისო კილაძეს 10 წლით პატიმრობა მიესაჯა. გადაწყვეტილება თბილისის საქალაქო სასამართლოს მოსამართლემ ჯვებე ნაჭყებიამ დღეს, 17 ნოემბერს გამოაცხადა.
ჟურნალისტი თაღლითური ქოლ-ცენტრების საქმეზე დააკავეს და მას ორგანიზებული ჯგუფის მიერ თაღლითობას და უკანონო შემოსავლის ლეგალიზაციას ფულის გათეთრებას ედავებოდნენ.
კილაძე ბრალს არ აღიარებს და სასამართლოზე წარმოთქმულ საბოლოო სიტყვაში თქვა, რომ მისი ჟურნალისტური საქმიანობისთვის ისჯება.
"რთული გზა გავიარე. არ იყო მარტივი ცხრა თვე სამარტოო საკანში, მენატრებოდა შვილის ხმის გაგონება, ჩემი შვილიშვილების ყველა წარმატება გამოვტოვე, მაგრამ სიმართლე მაძლიერებდა. მაძლიერებდა ხალხის მხარდაჭერა, რომელიც კვირიდან კვირამდე ადვოკატის მეშვეობით აღწევდა ჩემთან, მაძლიერებდა ჩემი კოლეგების, რედაქტორების, ჟურნალისტების პროტესტი და პეტიცია, რომელიც გენერალური პროკურატურის მხრიდან უპასუხოდ დარჩა, მაძლიერებდა ჩემთვის უცნობი მძღოლის თანადგომა, რომელმაც საკუთარ ავტომობილს დააწერა - თავისუფლება ელისო კილაძესო და მომიწოდა, არ დანებდეო. არ დავნებდი, გადავრჩი, გავძლიერდი და ბრძოლას აუცილებლად გავაგრძელებ, დღეიდან ან თავისუფლებაზე ან ციხის საკნიდან.
ეს არის პოლიტიკური დაკვეთა და მისი ავტორი სუსის ექს-დირექტორი, მამუკა მდინარაძეა. სამწუხაროდ, მას მხარს დღემდე უმაგრებს თანაკურსელი და სიყრმის მეგობარი, გიორგი გვარაკიძე.მიზანი მიღწეულია, რედაქცია დარბეული და დახურულია, რედაქტორი ციხეშია. თქვენი გამამტყუნებელი განაჩენი იქნება ხელისუფლების პასუხი ჩემს ჟურნალისტურ საქმიანობაზე და ჩემი პოლიტიკური პატიმრობის დასტური. ბრალს არ ვაღიარებ, დამნაშავე არ ვარ. არ ვაპირებ, თავისუფლება მოვიპოვო ან საპროცესო გარიგებით, ან სხვა პირების წინააღმდეგ ცრუ ჩვენების ხარჯზე", - თქვა კილაძემ, რომლის სიტყვასაც სასამართლოდან ნეტგაზეთი ავრცელებს.
BM.GE
წყარო: bm.ge