ექსპორტიორები ავიარეისებზე ადგილებს წინასწარ ჯავშნიან – რა გამოწვევებით ხვდება მოცვის სეზონს სექტორი?

ახლო აღმოსავლეთის კონფლიქტის ფონზე საქართველოში ლურჯი მოცვის მწარმოებლები სეზონს გამოწვევებით ხვდებიან.

მოსავლის ერთ-ერთი სარეალიზაციო ბაზარი ყურის ქვეყნებია, სადაც ქართულ პროდუქციაზე მაღალი მოთხოვნაა. თუმცა, წელს მთავარ გამოწვევად ტრანსპორტირება რჩება. გაუქმებული და გადადებული რეისები ერთის მხრივ გაურკვევლობას ზრდის და მეორეს მხრივ თუ აქამდე დუბაი და დოჰა ლოგისტიკურ ჰაბად გამოიყენებოდა, წელს არსებული კონფლიქტის გამო ამ გზით სარგებლობა გართულებულია.

როგორც „აგრითაჩის“ დამფუძნებელი ეკა ვეფხვაძე „საქმის კურსთან“ ამბობს, ლურჯი მოცვის სეზონი რამდენიმე კვირაში დაიწყება. შესაბამისად, დაიწყო პარტნიორებთან მუშაობა, რომ ავიარეისებზე წინასწარი ჯავშნები გაკეთდეს.

"ჩვენ უკვე ველაპარაკებით ავიახაზებს, რომ ის რეისებიც რაც არის ამ ეტაპზე, დავჯავშნოთ, წინასწარ გვქონდეს სივრცე დაჯავშნილი. თუმცა ომმა ძალიან დიდი ზეგავლენა მოახდინა ლოგისტიკური კუთხით... გაურკვეველი ვითარებაა, რომელსაც ახლავს რეისების გადადება, საწვავის გაძვირება, ზოგი ავიაკომპანია საერთოდ არ ასრულებს ჯერჯერობით ფრენებს... აღსანიშნავია ისიც, რომ თავად დუბაიში ოპტიმისტური განწყობაა. სავაჭრო ქსელებს ვისაც ვესაუბრებით, ფიქრობენ რომ ძალიან მალე უნდა აღმოიფხვრას ეს პრობლემა და ელიან, რომ მალე აღდგება სრულფასოვანი ავიამიმოსვლა“, - ამბობს ეკა ვეფხვაძე.

წელს ფერმერები რეკორდულ, 10-11 ათას ტონამდე მოსავალს ელოდებიან, რაც მნიშვნელოვნად აღემატება შარშანდელ მაჩვენებელს, როდესაც მოცვის მოსავალმა 7 000 ტონა შეადგინა, თუმცა კლიმატურმა პირობებმა, კერძოდ სამეგრელოს რეგიონში მოსულმა სეტყვამ, შესაძლოა გავლენა იქონიოს სარეალიზაციო, კომერციული პროდუქტის მოცულობაზე.

„საექსპორტო ბაზრებს წელს დიდი დაინტერესება ევროპის ქვეყნებიდან, დიდი ბრიტანეთიდან, ასევე ისრაელიდან და ინდოეთიდან. თუმცა ნაკლებად სავარაუდოა, რომ აზიის მიმართულებით დიდი რაოდენობის გადატვირთვა შევძლოთ, იმ გამოწვევების ფონზე, რაც გადაზიდვების კუთხით გვაქვს. იმიტომ, რომ ჩვენ დუბაის და დოჰას ვიყენებდით ჰაბად და წელს ეს ნაკლებად სავარაუდოა რომ ეს ლოკაცია გამოვიყენოთ. ვფიქრობ, რომ ისევ დარჩება მოცვის სარეალიზაციოდ დაახლოებით 80% რუსეთის ბაზარი და დანარჩენი 20% სხვადასხვა ქვეყნები: ევროპა, ისრაელი და შეძლებისდაგვარად ყურის ქვეყნებშიც“, - ამბობს ეკა ვეფხვაძე