ეროვნული ბანკი განმარტავს რა გავლენა აქვს სავალუტო რეზერვების შესყიდვას რეფინანსირების სესხებზე
საქართველოს ეროვნული ბანკი განმარტავს, რომ კომერციული ბანკების მიერ რეფინანსირების სესხებზე მოთხოვნის შემცირება, მნიშვნელოვანწილად, სავალუტო ინტერვენციების შედეგად საბანკო სისტემაში ლარის ლიკვიდობის ზრდით არის განპირობებული.
ეროვნული ბანკის განცხადებით, ის საბანკო სისტემას ლარის იმ მოცულობის ლიკვიდობას აწვდის, რომელზეც მოთხოვნა არსებობს, რათა მოკლევადიანი საპროცენტო განაკვეთები მონეტარული პოლიტიკის მთავარ ინსტრუმენტთან - რეფინანსირების განაკვეთთან ახლოს შენარჩუნდეს.
„ეროვნული ბანკი საბანკო სისტემას აწვდის ლარის ლიკვიდობის იმ მოცულობას, რომელზეც სისტემაში მოთხოვნა არსებობს, რათა მოკლევადიანი საპროცენტო განაკვეთები მონეტარული პოლიტიკის მთავარი ინსტრუმენტის, რეფინანსირების განაკვეთის ახლოს ჩამოყალიბდეს. ამასთან, მნიშვნელოვანია აღინიშნოს, რომ საბანკო სისტემისთვის საჭირო ლარის ლიკვიდობა სხვადასხვა არხით შეიძლება იყოს მიწოდებული, ხოლო რეფინანსირების სესხები ამ მიწოდების დაბალანსების ერთ-ერთი ინსტრუმენტია“, - აცხადებს ეროვნული ბანკი.
სებ-ის განმარტებით, რეფინანსირების სესხების მოცულობის შემცირება პირდაპირ კავშირშია სავალუტო ბაზარზე განხორციელებულ ინტერვენციებთან, რომელთა შედეგადაც საბანკო სისტემაში დამატებითი ლარის რესურსი შევიდა.
„რეფინანსირების სესხების მოცულობის შემცირება მნიშვნელოვანწილად სავალუტო ინტერვენციების შედეგად საბანკო სისტემაში ლარის ლიკვიდობის ზრდას უკავშირდება. კერძოდ, 2025 წელს ეროვნულმა ბანკმა ჯამურად 2 მილიარდ 432 მილიონი აშშ დოლარი შეიძინა, რის შედეგადაც საბანკო სისტემას 6 მილიარდ 617 მილიონ ლარის ლიკვიდობა მიეწოდა. 2026 წლის მაისის მდგომარეობით კი შესყიდული უცხოური ვალუტის მოცულობამ 1 მილიარდ 465 მილიონი დოლარი შეადგინა, რაც საბანკო სისტემისთვის დამატებით 3 მილიარდ 936 მილიონი ლარის მიწოდებას ნიშნავს. შედეგად, საბანკო სისტემას საჭირო ლიკვიდობა საერთაშორისო რეზერვების აკუმულირების პროცესში მიეწოდება“, - აღნიშნულია ეროვნული ბანკის განმარტებაში.