ეროვნულმა ბანკმა მიკროსაფინანსო ორგანიზაცია „ალფა ექსპრესი“ 18 000 ლარით დააჯარიმა - მიზეზები

საქართველოს ეროვნულმა ბანკმა „მიკროსაფინანსო ორგანიზაცია ალფა ექსპრესი“ სხვადასხვა სახის დარღვევისთვის, ჯამში 18 000 ლარით დააჯარიმა.

ეროვნული ბანკის განმარტებით, შემოწმების შედეგად ორგანიზაციაში რამდენიმე სამართალდარღვევა გამოვლინდა, მათ შორის ინფორმაციის არასწორად წარმოდგენისა და ფულის გათეთრების აღკვეთის კანონმდებლობის დარღვევის ფაქტები.

ეროვნული ბანკის მიერ გამოქვეყნებული გადაწყვეტილების მიხედვით, მისო-ს ჯარიმები შემდეგი კონკრეტული დარღვევების გამო დაეკისრა:

• ინფორმაციის არასწორად წარდგენა: შემოწმების პროცესში ორგანიზაციის მიერ ეროვნული ბანკისთვის ხელთ არსებული ინფორმაციის/დოკუმენტაციის არასწორად წარმოდგენის 3 შემთხვევა დაფიქსირდა. „ჯარიმის წესის“ მიხედვით, თითოეულ ფაქტზე ორგანიზაცია 2 000 ლარით, სულ ჯამში კი 6 000 ლარით დაჯარიმდა. • საქმიანობის არსის დაუდგენლობა: 1 კლიენტთან მიმართებაში ორგანიზაციამ არ განახორციელა „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ კანონით გათვალისწინებული პრევენციული ზომა და არ დაადგინა საქმიანობის არსი. აღნიშნულზე ჯარიმამ 2 000 ლარი შეადგინა. • თანხების წარმომავლობის შეუსწავლელობა: 1 კლიენტთან მიმართებაში დაირღვა ამავე კანონის მოთხოვნები, რაც გულისხმობს იმას, რომ ორგანიზაციამ კანონმდებლობის შესაბამისად არ შეისწავლა ფულადი სახსრების წარმომავლობა. აღნიშნული დარღვევისთვის „ალფა ექსპრესს“ 3 000-ლარიანი ჯარიმა დაეკისრა. • ეროვნული ბანკის მოთხოვნების შეუსრულებლობა: სებ-ის პრეზიდენტის 2023 წლის 5 ივლისის განკარგულების საფუძველზე განხორციელებული შემოწმების შედეგად, ორგანიზაციამ დადგენილ ვადებში არ შეასრულა 2023 წლის 25 აგვისტოს წერილით განსაზღვრული მოთხოვნები. ამ ფაქტზე მისო-ს 7 000 ლარის გადახდა დაეკისრა.

საბოლოო ჯამში, გამოვლენილი დარღვევების ერთობლიობის საფუძველზე, „მიკროსაფინანსო ორგანიზაცია ალფა ექსპრესს“ სახელმწიფო ბიუჯეტის სასარგებლოდ 18 000 ლარის ოდენობის ფულადი ჯარიმის გადახდა მოუწევს.