„ეს არ არის ჩემი ნებით მიღებული გადაწყვეტილება“ - ლაგოდეხის დაცული ტერიტორიების დირექტორი თანამდებობიდან გაათავისუფლეს

ლაგოდეხის დაცული ტერიტორიების ადმინისტრაციის დირექტორმა, გიორგი სულამანიძემ თანამდებობა 21 სექტემბერს დატოვა. როგორც ის სოციალურ ქსელში წერს, ეს არ ყოფილა მისი ნება და დაცული ტერიტორიების სააგენტომ მასთან შრომითი ხელშეკრულება ცალმხრივად, ყოველგვარი გადაცდომისა თუ პროფესიული წარუმატებლობის გარეშე შეწყვიტა.

გიორგი სულამანიძე დაცული ტერიტორიების სისტემაში 19 წლის განმავლობაში მუშაობდა 2007 წლიდან სტაჟიორად დაიწყო, ხოლო ბოლო 16 წლის განმავლობაში ლაგოდეხის დაცულ ტერიტორიებს ხელმძღვანელობდა.

თავის განცხადებაში ყოფილი დირექტორი იმ მნიშვნელოვან მიღწევებსა და შედეგებზე ამახვილებს ყურადღებას, რომელთაც ამ წლების განმავლობაში გუნდთან ერთად მიაღწია: ნაკრძალისა და აღკვეთილის ცნობადობის ამაღლების შედეგად, ვიზიტორთა ნაკადი 2010 წლის 15 117-დან 2019 წელს 59 761-მდე გაიზარდა.

აღმოსავლეთკავკასიური ჯიხვის პოპულაცია დაახლოებით 350-დან 800-მდე, ხოლო არჩვის რაოდენობა 40-დან 250-მდე გაიზარდა.

განხორციელდა ჯიხვის GPS-მონიტორინგი, დაინერგა ინოვაციური მეთოდები, მათ შორის ფოტოხაფანგები (რომელთა მონაცემებს ბოლო ეტაპზე ხელოვნური ინტელექტით ამუშავებდნენ) და SMART-სისტემა.

განვითარდა ტურისტული ინფრასტრუქტურა, განახლდა მართვის გეგმები და გაძლიერდა თანამშრომლობა ადგილობრივ მოსახლეობასთან თუ სასაზღვრო პოლიციასთან.

გიორგი სულამანიძე თავის წასვლას სისტემაში მიმდინარე ზოგად პროცესებს უკავშირებს და აღნიშნავს, რომ ბოლო ერთ წელიწადში დაცული ტერიტორიების სააგენტოში სამი მენეჯმენტი შეიცვალა და ორი რეორგანიზაცია განხორციელდა, რასაც მრავალი კვალიფიციური კადრის წასვლა მოჰყვა.

„ჩემთვის განსაკუთრებით შემაშფოთებელია მართვის ისეთი პრაქტიკის გაძლიერება, რომელიც პროფესიული დამოუკიდებლობის, სამართლიანობისა და ადამიანების ღირსების საკითხებს აჩენს. თანამედროვე მართვის ინსტრუმენტები, მათ შორის SMART, უნდა ემსახურებოდეს დაცვითი საქმიანობის ეფექტიანობას და არა მხოლოდ დისციპლინარული ზეწოლის მექანიზმად იქცეს. პროფესიონალების სისტემიდან ჩამოშორება ბუნებისდაცვით სფეროს წლებით უკან დახევის რისკს უქმნის“, - აცხადებს სულამანიძე.

მან მადლობა გადაუხადა კოლეგებსა და თანამშრომლებს მრავალწლიანი ნდობისთვის და აღნიშნა, რომ მიუხედავად თანამდებობის დატოვებისა, იგი ბუნებისდაცვით მისიას არ ჩამოშორდება.