EU აზერბაიჯანსა და სომხეთს შორის მშვიდობის მხარდასაჭერად €200 მილიონს გამოყოფს
ევროკავშირი სამხრეთ კავკასიაში სატრანსპორტო, ენერგეტიკული და ციფრული კავშირების გასაძლიერებლად 200 მილიონ ევრომდე გრანტს გამოყოფს - ამის შესახებ ევროკომისიის პრეზიდენტმა ურსულა ფონ დერ ლაიენმა ბაქოში ვიზიტისას განაცხადა.
ფონ დერ ლაიენმა, რომელიც აზერბაიჯანის პრეზიდენტ ილჰამ ალიევს ევროკომისარ მარტა კოსთან ერთად შეხვდა, აღნიშნა, რომ ინიციატივის მიზანი აზერბაიჯანსა და სომხეთს შორის მშვიდობის მხარდაჭერაა, რეგიონული კავშირების გაძლიერებისა და ადგილობრივი თემებისთვის მიზნობრივი დახმარების გაწევის გზით.
სომხეთი და აზერბაიჯანი თითქმის ოთხი ათწლეულის განმავლობაში იმყოფებოდნენ საომარ მდგომარეობაში მთიანი ყარაბაღის რეგიონის გამო. მხარეებმა აშშ-ის მედიაციით სამშვიდობო შეთანხმებას გასულ აგვისტოში მიაღწიეს, თეთრ სახლში პრეზიდენტ დონალდ ტრამპთან შეხვედრის შემდეგ.
"ჩვენი პაკეტი - "მშვიდობა კავშირების მეშვეობით" (Peace through Connectivity Package) დაეხმარება სამხრეთ კავკასიისთვის მშვიდობიანი და აყვავებული მომავლის შექმნას. ერთად ჩვენ შეგვიძლია ქაღალდზე დაწერილი მშვიდობა რეალურ მშვიდობად ვაქციოთ", - განაცხადა ფონ დერ ლაიენმა.
ევროკომისიის განცხადებით, დამატებით 20 მილიონი ევრო გამოიყოფა სომხეთსა და აზერბაიჯანში ადგილობრივი თემების მხარდაჭერის პროგრამისთვის, რაც მოიცავს ინვესტიციებს ჯანდაცვაში, განაღმვით სამუშაოებში, პროფესიული უნარების განვითარებასა და ადგილობრივი ბიზნესის ხელშეწყობაში.
BM.GE
წყარო: bm.ge