ევროკავშირმა Google-ს €403-მილიონიანი ჯარიმა დააკისრა
ევროკავშირის მონაცემთა დაცვის კომისიამ ამერიკული ტექნოლოგიური გიგანტი Google-ი მომხმარებელთა ადგილმდებარეობის მონაცემების არამართლზომიერი დამუშავების გამო €403 მილიონით დააჯარიმა.
უწყებამ ოფიციალური გამოძიება 2020 წლის თებერვალში დაიწყო, საბოლოო გადაწყვეტილებით კი დაადგინა, რომ კომპანიამ 2018 წლის მაისიდან 2020 წლის თებერვლამდე პერიოდში ევროკავშირის მონაცემთა დაცვის ზოგადი რეგულაციის (GDPR) მოთხოვნები დაარღვია. მარეგულირებლის ცნობით, დარღვევა ვებგვერდებისა და აპლიკაციების აქტივობისას, ასევე ადგილმდებარეობის ისტორიის დამუშავებისას კანონიერებისა და სამართლიანობის პრინციპების იგნორირებას უკავშირდება.
ამასთან, მონაცემთა დაცვის კომისიის კომისრის მოადგილემ, გრემ დოილმა აღნიშნა, რომ კომპანიის ხარვეზების გამო მომხმარებლები, შესაძლოა, ვერც კი აცნობიერებდნენ, რომ ადვერტაიზერები მათ ლოკაციას სარეკლამო მიზნებისთვის ან ინტერესების დასადგენად იყენებდნენ.
ფინანსურ სანქციასთან ერთად, მარეგულირებელმა ორგანომ ტექნოლოგიურ გიგანტს მონაცემთა დამუშავების პროცესების ევროპულ სტანდარტებთან შესაბამისობაში მოყვანა ექვსი თვის ვადაში დაავალა. წინააღმდეგ შემთხვევაში, განმეორებითი სანქცია გაცილებით უფრო მკაცრი იქნება.
რაც შეეხება Google-ის პოზიციას, კომპანიის წარმომადგენელმა განაცხადა, რომ საქმე ეხება ძველ პოლიტიკას, რომელიც უკვე განახლდა. მათი მტკიცებით, 2019 წლიდან პრაქტიკა მნიშვნელოვნად გაუმჯობესდა და შეიქმნა ინსტრუმენტები, რომლებიც მომხმარებლებს ლოკაციის მონაცემების მართვას ამარტივებს.
BM.GE
წყარო: bm.ge