ევროკავშირმა რუსეთის წინააღმდეგ სანქციების გახანგრძლივებაზე შეთანხმებას ვერ მიაღწია

ევროკავშირის წევრმა სახელმწიფოებმა რუსეთის წინააღმდეგ დაწესებული პერსონალური სანქციების გახანგრძლივებაზე გადაწყვეტილება ვერ მიიღეს.

POLITICO-ს ინფორმაციით, ბრიუსელში გამართულ შეხვედრაზე ელჩებმა შეთანხმებას ვერ მიაღწიეს, თუმცა კონსულტაციების დღესვე გაგრძელების გადაწყვეტილება მიიღეს. ცნობისთვის, მოქმედი შეზღუდვები 3,000-მდე ფიზიკური და იურიდიული პირის საბანკო აქტივების გაყინვას ითვალისწინებდა.

საყურადღებოა, რომ თუ მხარეები ერთსულოვან გადაწყვეტილებას სამშაბათამდე ვერ მიიღებენ, სანქციების მოქმედების ვადა ავტომატურად ამოიწურება.

თავად მოლაპარაკებების შეფერხების მთავარი მიზეზი სლოვაკეთისა და საფრანგეთის პოზიციები გახდა. ოფიციალურმა ბრატისლავამ სანქცირებულთა სიიდან ორი გავლენიანი რუსი ბიზნესმენის, ალიშერ უსმანოვისა და მიხაილ ფრიდმანის ამოღება კატეგორიულად მოითხოვა. ამას გარდა, სლოვაკეთის ხელისუფლებამ სანქციების გადახედვის ვადის 12 თვემდე გაზრდას მხარი არ დაუჭირა და ძველი - 6-თვიანი ციკლის შენარჩუნება მოითხოვა. საფრანგეთმა კი კომპრომისის სახით მხოლოდ უსმანოვის სიიდან ამოღების ინიციატივა წამოაყენა.

ფრანგული მხარის განმარტებით, სლოვაკეთთან ერთად უსმანოვისთვის სანქციების მოთხოვნით პარიზის მიზანი არა ოლიგარქისთვის ხელის შეწყობა, არამედ ბრატისლავასთან კომპრომისის მიღწევა იყო, რათა ფიცოს ხელისუფლებას სანქციების რეჟიმის გახანგრძლივების პროცესი სრულად არ ჩაეშალა.

საყურადღებოა, რომ ევროპელი ლიდერების უდიდესმა უმრავლესობამ რუსი ოლიგარქებისთვის სანქციების შემსუბუქების ყოველგვარი მცდელობა მკაცრად დაგმო. ევროკავშირის წევრებმა უკრაინის სამოქალაქო ინფრასტრუქტურაზე რუსეთის მასირებული თავდასხმების ფონზე პოზიციების დათმობა მიუღებლად მიიჩნიეს. ერთ-ერთი ევროპელი დიპლომატის შეფასებით, პოლონეთის საზღვართან რუსული დრონების აქტივობის გათვალისწინებით, საფრანგეთის მოთხოვნა გაუგებარიც კი იყო. მოკავშირეებმა სლოვაკეთისა და საფრანგეთის ინიციატივების გამო ღრმა იმედგაცრუება გამოხატეს.

მნიშვნელოვანია ითქვას, რომ შექმნილ ვითარებას უკრაინის პრეზიდენტი ვოლოდიმირ ზელენსკი მწვავე განცხადებით გამოეხმაურა და ევროკავშირს რუსი ოლიგარქების სანქციების სიაში დატოვება მოსთხოვა. უკრაინის პრეზიდენტმა ყოველდღიური სარაკეტო იერიშების ფონზე ოლიგარქების მიმართ შეზღუდვების შემსუბუქების განხილვაც კი დაუშვებლად შეაფასა.

ზელენსკის განცხადებით, კრემლის სამხედრო ბიუჯეტის დამფინანსებელმა ბიზნესმენებმა ომის მძიმე შედეგები საკუთარ თავზე სრულად უნდა იგრძნონ. უკრაინის ლიდერმა დასძინა, რომ უსმანოვსა და ფრიდმანს ომის შესაჩერებლად არანაირი ქმედითი ნაბიჯი არ გადაუდგამთ. ზელენსკიმ ევროპელ პარტნიორებს მოუწოდა, კიევის დასუსტების ნაცვლად მოსკოვზე ეკონომიკური ზეწოლის გაძლიერებაზე იზრუნონ.

ცნობისთვის, ევროკავშირის პერსონალური სანქციების მოქმედების ვადა 15 სექტემბერს იწურება, რეჟიმის გახანგრძლივება კი წევრი ქვეყნების სრულ ერთსულოვნებას მოითხოვს.