ევროკომისიამ კანადას ბლოკის ასოცირებული წევრობა შესთავაზა

ევროკომისიის პრეზიდენტმა ურსულა ფონ დერ ლაიენმა კანადას ევროკავშირის პირველი ასოცირებული წევრობის შესაძლებლობა ოფიციალურად შესთავაზა.

როგორც ირკვევა, სტრასბურგში, ევროპარლამენტის პლენარულ სესიაზე ყოველწლიური სიტყვით გამოსვლისას, ევროპული გაერთიანების ლიდერმა ოტავასთან პარტნიორული კავშირების უმაღლეს დონეზე აყვანის სურვილი გამოთქვა.

ფონ დერ ლაიენმა დარბაზში მყოფ კანადის პრემიერ-მინისტრ მარკ კარნის პირადად მიმართა და ორმხრივი ურთიერთობების გადახედვის პროცესში ერთობლივი მუშაობა შესთავაზა. ევროპული გაერთიანების ხელმძღვანელის განცხადებით, ბრიუსელი ტრანსატლანტიკური თანამშრომლობის გაფართოებისთვის უკვე მზადაა.

მნიშვნელოვანია ითქვას, რომ კანადის პრემიერ-მინისტრმა მარკ კარნიმ ევროპასთან უსაფრთხოებისა და ეკონომიკის სფეროში „უნიკალური ალიანსის“ შექმნის სურვილი ადრეც დააფიქსირა. მართალია, ოფიციალური ოტავა ბლოკის სრულფასოვან წევრობას არ ითხოვს, თუმცა ის ევროპულ მხარესთან დაახლოებას კონკრეტული სტრატეგიული მიმართულებებით გეგმავს.

როგორც ირკვევა, კანადის პრემიერ-მინისტრი მიზნად ევროპასთან ეკონომიკური და თავდაცვითი კავშირების გაღრმავებას ისახავს. კარნის განცხადებით, შეცვლილი გლობალური ვითარება საერთაშორისო პარტნიორებს შორის თანამშრომლობის ახალი მოდელების ჩამოყალიბებას მოითხოვს.

ცნობისთვის, კანადისა და ევროკავშირის დაახლოება პირდაპირაა დაკავშირებული ოტავასა და ვაშინგტონს შორის ურთიერთობების დაზიანებასთან, რაც სავაჭრო დავის გამო ბოლო თვეებში მკვეთრად გამწვავდა. დონალდ ტრამპის ადმინისტრაციის მიერ დაწესებული ტარიფების საპასუხოდ, კარნის კაბინეტმა ამერიკულ პროდუქციაზე ანალოგიური მასშტაბის ფინანსური შეზღუდვები დააწესა.