ევროპარლამენტი სომხეთისთვის საბაჟო შეღავათების დაწესებას 15 სექტემბერს უყრის კენჭს

ევროპარლამენტი სომხეთიდან იმპორტირებულ პროდუქციაზე საბაჟო გადასახადების ორწლიანი ვადით გაუქმების საკითხს 15 სექტემბერს კენჭს უყრის. აღსანიშნავია, რომ ევროკომისიის მიერ მომზადებულ საკანონმდებლო ინიციატივას ევროკავშირის საბჭომ მხარი უკვე დაუჭირა. ეს გადაწყვეტილება მიზნად ევროპულ ბაზარზე სომხური პროდუქციის შესვლის გამარტივებასა და ადგილობრივი ეკონომიკის მხარდაჭერას ისახავს.

საყურადღებოა, რომ ახალი სავაჭრო პაკეტი სომხური წარმოების რვა სახეობის აგრარულ პროდუქტზე უბაჟო კვოტების დაწესებას ითვალისწინებს. შეღავათები ყურძენს, გარგარს, ბალს, ატამსა და კიტრს მოიცავს. დოკუმენტი ასევე აწესებს დამცავ მექანიზმებს, რომელთა გამოყენებასაც ევროკავშირი ადგილობრივი მწარმოებლების ინტერესების დასაცავად შეძლებს. თუ სომხეთიდან იმპორტის მკვეთრ ზრდას ევროპელ ფერმერებზე უარყოფითი გავლენა ექნება, ბრიუსელი სავაჭრო პროცესში დაუყოვნებლივ ჩაერევა.

მნიშვნელოვანია ითქვას, რომ ევროკავშირის ეს ნაბიჯი რუსეთის მიერ დაწესებულ შეზღუდვებთან არის დაკავშირებული. ევროკომისიის შეფასებით, მოსკოვის მიერ შემოღებულმა სავაჭრო ბარიერებმა სომხეთის ტრადიციული მიწოდების ჯაჭვები მოშალა და ქვეყნის საექსპორტო შესაძლებლობები საგრძნობლად შეზღუდა. შესაბამისად, შექმნილმა ვითარებამ სომხურ მცირე და საშუალო ბიზნესს, განსაკუთრებით კი სასოფლო-სამეურნეო სექტორს, მძიმე დარტყმა მიაყენა. რაც ბრიუსელის მხრიდან საჩქარო რეაგირებას მოითხოვდა.

შეგახსენებთ, რუსეთმა სომხურ ალკოჰოლურ სასმელებზე, მინერალურ წყლებზე, ხილ-ბოსტნეულსა და საკუთარ ტერიტორიაზე ტვირთების ტრანზიტზე მკაცრი შეზღუდვები 2026 წლის მაისში დააწესა.