ევროპის საბჭო რუსეთის წინააღმდეგ ახალ ტრიბუნალს ქმნის
ევროპის საბჭოს მინისტრთა კომიტეტმა სპეციალური ტრიბუნალის სამუშაო ჯგუფის შექმნის შესახებ გაფართოებული შეთანხმება დაამტკიცა. როგორც ირკვევა, არსებული საერთაშორისო სასამართლოები უფლებამოსილნი არიან განიხილონ ომის დანაშაულები, კაცობრიობის წინააღმდეგ მიმართული ქმედებები და გენოციდი, თუმცა პოლიტიკური ლიდერების პასუხისმგებლობის საკითხი აგრესიული ომის გაჩაღებისთვის სამართლებრივად გაცილებით რთულ პროცედურებთან არის დაკავშირებული.
ექსპერტების განმარტებით, საერთაშორისო სისხლის სამართლის სასამართლოს (ICC) იურისდიქცია აგრესიის დანაშაულზე მეტად შეზღუდულია და მხოლოდ იმ შემთხვევებზე ვრცელდება, როდესაც მხარეები ამას წინასწარ მკაფიოდ აღიარებენ. ამ ფაქტორმა უკრაინის ხელისუფლებას ინოვაციური საერთაშორისო მექანიზმების ძიებისკენ უბიძგა, რათა აგრესიის დანაშაული საერთაშორისო დონეზე დასჯადი გახდეს.
აღსანიშნავია, რომ ტრიბუნალის პლატფორმად ევროპის საბჭო გაეროს ნაცვლად მიზანმიმართულად შეირჩა. გაეროს უშიშროების საბჭოს მეშვეობით მსგავსი ორგანოს შექმნა არარეალისტური იყო, რადგან რუსეთი ნებისმიერ მსგავს ინიციატივას ვეტოს დაადებდა. ევროპის საბჭოს ჩართულობა კი პროცესს საერთაშორისო ლეგიტიმაციას სძენს და უზრუნველყოფს, რომ ტრიბუნალი მხოლოდ მცირე ჯგუფის მიერ მიღებულ სუბიექტურ გადაწყვეტილებად არ აღიქმებოდეს.
რაც შეეხება ვადებსა და გამოწვევებს, არსებული ინფორმაციით, ტრიბუნალმა მუშაობა შესაძლოა მომავალი წლიდან დაიწყოს. მანამდე მოსაგვარებელია ისეთი საკითხები, როგორიცაა შიდა პოლიტიკის დოკუმენტების მომზადება, საბიუჯეტო საკითხები და პერსონალის შერჩევა.
ცნობისთვის, აგრესიის დანაშაულზე საერთაშორისო მართლმსაჯულების პრეცედენტი მხოლოდ ნიურნბერგისა და ტოკიოს ტრიბუნალების სახით არსებობს. მას შემდეგ საერთაშორისო სამართალში აგრესიის ფაქტზე უნივერსალური იურისდიქციის მქონე მექანიზმი არ შექმნილა.
BM.GE
წყარო: bm.ge