ფასების ზრდის გამო ევროკომისიამ ქვეყნებს ენერგომოხმარების შემცირებისკენ მოუწოდა
ევროკავშირში ენერგეტიკული კრიზისისა და ფასების მკვეთრი მატების ფონზე, ევროკომისიამ წევრ სახელმწიფოებს გაზსა და ელექტროენერგიაზე მოთხოვნის შემცირებისკენ მოუწოდა. არსებული ინფორმაციით, ენერგეტიკისა და საბინაო პოლიტიკის საკითხებში ევროკომისარმა დენ იორგენსენმა წევრი ქვეყნების მინისტრებს ოფიციალური წერილი გასული კვირის ბოლოს გაუგზავნა.
POLITICO-ს მიერ მოპოვებულ დოკუმენტში ევროკომისარი განმარტავს, რომ შეზღუდული გლობალური მიწოდებისა და მაღალი მერყეობის პირობებში მოხმარების შემცირება შესაძლოა ფასების შეკავების საუკეთესო ინსტრუმენტად იქცეს. იორგენსენმა წერილში ხაზგასმით აღნიშნა, რომ ევროპულ სახელმწიფოებს ენერგიის დაზოგვა მხოლოდ განსაზღვრული, საჭირო ვადით მოუწევთ.
დოკუმენტის თანახმად, შექმნილი ვითარების სირთულის მიუხედავად, ევროპის ენერგეტიკულ უსაფრთხოებას დაუყოვნებლივი საფრთხე ამ ეტაპზე არ ემუქრება, თუმცა რისკებისაგან თავის დაზღვევა საჭიროა.
ცნობისთვის, ევროპის მიწისქვეშა საცავებში გაზის მარაგი ამჟამად მოცულობის 68%-ს შეადგენს.
BM.GE
წყარო: bm.ge