ტრამპი და პუტინი უკრაინაში ომის დასრულების საკითხს ჩინეთში დაგეგმილ შეხვედრაზე განიხილავენ
აშშ-ის პრეზიდენტი დონალდ ტრამპი და რუსეთის პრეზიდენტი ვლადიმერ პუტინი მომავალ კვირას ჩინეთში დაგეგმილ შეხვედრაზე უკრაინაში ომის დასრულების საკითხს განიხილავენ.
კრემლის თანაშემწის, იური უშაკოვის განცხადებით, ლიდერები ქალაქ შენჟენში, აზია-წყნარი ოკეანის ეკონომიკური თანამშრომლობის სამიტზე 18-19 ნოემბერს შეხვდებიან.
უშაკოვმა აღნიშნა, რომ მხარეები ურთიერთობების დარეგულირებასთან დაკავშირებული საკითხების სრული სპექტრის განხილვასაც გეგმავენ. როგორც კრემლის წარმომადგენელმა განაცხადა, კონფერენციის ფარგლებში პრეზიდენტებმა შესაძლოა სამმხრივი მოლაპარაკებები ჩინეთის ლიდერ სი ძინპინთანაც გამართონ.
საყურადღებოა, რომ ჩინეთში დაგეგმილ მოლაპარაკებებში უკრაინისა და ევროპის წარმომადგენლები მონაწილეობას არ მიიღებენ.
უკრაინის საგარეო საქმეთა მინისტრმა ანდრიი სიბიჰამ განაცხადა, რომ რუსეთის, ჩინეთისა და აშშ-ის ლიდერების სამმხრივი შეხვედრა პუტინს მხოლოდ ომის გაგრძელებისკენ უბიძგებს. სიბიჰას თქმით, მშვიდობისკენ გადადგმული ბევრად უფრო პროდუქტიული ნაბიჯი ტრამპის, პუტინისა და უკრაინის პრეზიდენტ ვოლოდიმირ ზელენსკის სამმხრივი შეხვედრა იქნებოდა, თუმცა რუსეთის ლიდერი ზელენსკისთან პირისპირ შეხვედრაზე კვლავ უარს ამბობს.
BM.GE
წყარო: bm.ge