Galt&Taggart-მა 2026 წლისთვის ეკონომიკური ზრდის პროგნოზი 7.5%-მდე, ინფლაციის 5.1%-მდე გაზარდა

Galt&Taggart-მა 2026 წლისთვის საქართველოს ეკონომიკური ზრდის პროგნოზი 7.5%-მდე გაზარდა.

როგორც საინვესტიციო ბანკი ეკონომიკურ მიმოხილვაში აღნიშნავს, წლის პირველი ნახევრის ძლიერი ეკონომიკური აქტივობის გათვალისწინებით, 2026 წლის ეკონომიკური ზრდის პროგნოზი 7%-დან 7.5%-მდე გაზარდეს.

“საქსტატის წინასწარი მონაცემებით, 2026 წლის ივნისში რეალური მშპ-ის წლიური ზრდა 8.6%-მდე დაჩქარდა, წინა თვის 6.4%-იანი ზრდის შემდეგ. ჯამურად, 2026 წლის პირველ ნახევარში საქართველოს ეკონომიკა 7.9%-ით გაიზარდა. ივნისის ზრდა ძირითადად განაპირობა დამამუშავებელი მრეწველობის, ტრანსპორტის, მშენებლობის, ინფორმაცია & კომუნიკაციის და საფინანსო საქმიანობის დარგებმა. ამასთან, კლება დაფიქსირდა ენერგეტიკის და სამთომოპოვებითი მრეწველობის დარგებში”, - ნათქვამია მიმოხილვაში.

ამასთან, Galt&Taggart-მა მიმდინარე წლისთვის ინფლაციის პროგნოზსაც გადახედა. საინვესტიციო ბანკი ვარაუდობს, რომ წელს საშუალო ინფლაცია 5.1% იქნება, ნაცვლად აქამდე ნავარაუდევი 4.8%-ისა. როგორც საინვესტიციო ბანკი აღნიშნავს, ივლისში ჰორმუზის სრუტის დაკეტვის შემდეგ ნავთობის გლობალური ფასების ზრდა, სავარაუდოდ, მომდევნო თვეებში ენერგომატარებლების ფასების მოსალოდნელ შენელებას შეაფერხებს.

აღსანიშნავია, რომ მიმდინარე წლისთვის საშუალო ინფლაციის პროგნოზი 4.9%-დან 5.2%-მდე გაზარდა ეროვნულმა ბანკმაც. როგორც სებ-ში განმარტავენ, ახლო აღმოსავლეთში გეოპოლიტიკურმა დაძაბულობამ ენერგორესურსების საერთაშორისო ფასების მერყეობა გაზარდა. ამასთან, კონფლიქტის გახანგრძლივების შემთხვევაში ენერგორესურსების გაძვირების არაპირდაპირი ინფლაციური ეფექტების რისკებიც იზრდება.