გარემოს ზედამხედველობის დეპარტამენტის უფროსად შემოსავლების სამსახურის ყოფილი მაღალჩინოსანი დაინიშნა
გარემოსდაცვითი ზედამხედველობის დეპარტამენტში საკადრო ცვლილებაა. უწყების უფროსის პოსტზე ლევან ჯღარკავა პაატა კილაძემ შეცვალა. გარემოს დაცვისა და სოფლის მეურნეობის მინისტრის, დავით სონღულაშვილის განცხადებით, აღნიშნული ცვლილება როტაციული ხასიათისაა და ჯღარკავა საქმიანობას სამინისტროს სისტემაშივე გააგრძელებს.
ცვლილება პრემიერის ბრძანებით გასულ კვირას აისახა და ეს bm.ge-მ მაშინაც დაწერა.
გარემოსდაცვითი ზედამხედველობის დეპარტამენტის უფროსი შეიცვალა - მიზეზი უცნობია
მინისტრმა ახალი ხელმძღვანელი თანამშრომლებს უკვე წარუდგინა და ყურადღება გაამახვილა იმ რეფორმებსა და ღონისძიებებზე, რომლებიც გარემოსდაცვითი სახელმწიფო კონტროლის მიმართულებით არის დაგეგმილი. სონღულაშვილის თქმით, კილაძეს საჯარო სექტორში მუშაობის დიდი გამოცდილება აქვს, რაც გუნდს კიდევ უფრო გააძლიერებს.
პროფესიით ეკონომისტსა და იურისტ პაატა კილაძეს საჯარო უწყებებში მუშაობის მრავალწლიანი სტაჟი აქვს. იგი სხვადასხვა დროს ხელმძღვანელ პოზიციებს იკავებდა ფინანსთა სამინისტროსა და საგადასახადო სტრუქტურებში, ხოლო 2021 წლიდან დღემდე სსიპ შემოსავლების სამსახურის უფროსის პირველ მოადგილედუშაობდა.
თავის მხრივ, კილაძემ აღნიშნა, რომ დეპარტამენტის საქმიანობას ქვეყნისთვის განსაკუთრებული მნიშვნელობა აქვს და მზადყოფნა გამოთქვა, საკუთარი გამოცდილება დასახული ამოცანების ეფექტიანად შესრულებას მოახმაროს.
გარემოსდაცვითი ზედამხედველობის დეპარტამენტი გარემოს დაცვისა და სოფლის მეურნეობის სამინისტროს სახელმწიფო საქვეუწყებო დაწესებულებაა. უწყება უზრუნველყოფს გარემოს დაცვისა და ბუნებრივი რესურსებით სარგებლობის სფეროში სახელმწიფო კონტროლს საქართველოს მთელ ტერიტორიაზე, მათ შორის ტერიტორიულ წყლებში, კონტინენტურ შელფსა და განსაკუთრებულ ეკონომიკურ ზონაში.
BM.GE
წყარო: bm.ge