გათიშვის ფონზე, საქართველოში ელექტროენერგიის მიწოდება 4-ჯერ შემცირდა

ქვეყნის მასშტაბით ელექტროენერგიის გათიშვის ფონზე, ელექტროენერგიის მიწოდება 4-ჯერ და მეტად შემცირდა.

სახელმწიფო ელექტროსისტემის ვებგვერდის თანახმად, გათიშვამდე მიწოდების მაჩვენებელი 2.1 გიგავატი იყო, ამჟამად კი 500 მეგავატზე ნაკლებია.

ცნობისთვის, 5 აგვისტოს საქართველოში ელექტროენერგია სისტემურად გაითიშა. ეს რიგით მესამე შემთხვევაა, 24-25 ივლისს დაფიქსირებულის შემდეგ. ჯერჯერობით მიზეზი უცნობია.

BMG არკვევს, ამჟამად რატომ გაითიშა ქვეყანაში ელექტროენერგიის მიწოდება.

შეგახსენებთ, 24 ივლისს ქვეყნის მასშტაბით ელექტროენერგიის მიწოდება ავარიულად შეწყდა. შეფერხებები 25 ივლისსაც დაფიქსირდა. მომხდართან დაკავშირებით სემეკი ადმინისტრაციულ მოკვლევას აწარმოებს, ხოლო საქართველოს სახელმწიფო უსაფრთხოების სამსახურმა გამოძიება საბოტაჟის მუხლით დაიწყო.

სემეკის სამუშაო ჯგუფის პირველადი შეფასებით, 24 ივლისს საქართველოს ენერგოსისტემა პარალელურ რეჟიმში მუშაობდა აზერბაიჯანის ენერგოსისტემასთან, თუმცა დაახლოებით 00:10 საათზე მოხდა ორი ენერგოსისტემის გამიჯვნა, რის შემდეგაც საქართველოს ენერგოსისტემა იზოლირებულ რეჟიმში დარჩა. კომისიის ინფორმაციით, დაიწყო სიხშირისა და ძაბვის ვარდნა, რასაც კასკადური გამორთვები და საბოლოოდ ენერგოსისტემის სრული ჩაქრობა მოჰყვა.