Google-მა აშშ-ის მიღმა ყველაზე დიდი AI ჰაბის მშენებლობა ინდოეთში დაიწყო - ინვესტიცია $15 მილიარდია

ამერიკულმა ტექნოლოგიურმა გიგანტმა, Google-მა ინდოეთის ქალაქ ვიზახაპატნამში აშშ-ის ფარგლებს გარეთ ხელოვნური ინტელექტის ყველაზე მასშტაბური ცენტრის მშენებლობა დაიწყო.

პროექტის ფარგლებში, მომდევნო ხუთი წლის განმავლობაში კომპანია $15 მილიარდის მოცულობის ინვესტიციის განხორციელებას გეგმავს. აღნიშნული ინიციატივა ინდოეთის ციფრული განვითარების პროცესში Google-ის მიერ აღებულ ყველაზე მნიშვნელოვან ვალდებულებად მიიჩნევა.

ინფრასტრუქტურული პროექტი ითვალისწინებს 1 გიგავატის სიმძლავრის მონაცემთა ცენტრს, რომელიც Gemini-სა და Google Search-ის მსგავსი სერვისების გამართულ მუშაობას უზრუნველყოფს. ბიკაშ კოლეიმ, რომელიც Google-ში გლობალური ინფრასტრუქტურის მიმართულებას ხელმძღვანელობს, აღნიშნა, რომ ობიექტი მიზნად სრულფასოვანი AI-ეკოსისტემის შექმნას ისახავს. აღსანიშნავია, რომ პროექტის დასრულების შემდეგ ვიზახაპატნამი ინდოეთსა და სინგაპურს შორის წყალქვეშა ინტერნეტ-კაბელების დამაკავშირებელ ახალ წერტილად იქცევა. შესაბამისად, Google-ის ინდური ინვესტიციით არამარტო თავად ქვეყანა, არამედ მთელი რეგიონიც ისარგებლებს.

აღსანიშნავია, რომ ახალი სტრატეგიული ბოჭკოვანი კაბელი ინდოეთს დანარჩენ მსოფლიოსთან დააკავშირებს და მუმბაისა თუ ჩენაის არსებულ სატრანზიტო გზებს დამატებით ალტერნატივას შესთავაზებს. ანდრა-პრადეშის შტატის ინფორმაციული ტექნოლოგიების მინისტრმა, ნარა ლოკეშმა განაცხადა, რომ რეგიონი ქვეყნის ყველაზე მოთხოვნად ტექნოლოგიურ ჰაბად ჩამოყალიბდება. მისი თქმით, ეს პროექტი ინდოეთის ციფრული სისტემის გამძლეობას გაზრდის და ქვეყნის ეკონომიკურ უსაფრთხოებას გააძლიერებს.