Google, Microsoft და xAI ამერიკის მთავრობას AI-მოდელებს საჯაროდ წარდგენამდე გაუზიარებენ

ამერიკული ტექნოლოგიური გიგანტები Google-ი, Microsoft-ი და xAI საკუთარ ხელოვნურ ინტელექტზე მომუშავე მოდელებს, მათ ოფიციალურ გამოქვეყნებამდე, აშშ-ის მთავრობას გააცნობენ.

სტანდარტებისა და ტექნოლოგიების ეროვნული ინსტიტუტის ინფორმაციით, პარტნიორობა კიბერუსაფრთხოების საფრთხეების პრევენციას ისახავს მიზნად. ხელშეკრულება აშშ-ის ვაჭრობის დეპარტამენტს საშუალებას მისცემს, ახალი მოდელების გავლენა ეროვნულ უსაფრთხოებასა და საზოგადოებრივ წესრიგზე წინასწარ შეაფასოს.

კერძო სექტორსა და სახელმწიფოს შორის თანამშრომლობა მას შემდეგ გააქტიურდა, რაც კომპანია Anthropic-ის ახალმა მოდელმა, სახელწოდებით Mythos-მა, კიბერუსაფრთხოების კუთხით არსებული რისკები კრიტიკულ ზღვრამდე მიიყვანა. მწარმოებლის განცხადებით, დასახელებული მოდელი სხვა ანალოგებს შესაძლებლობებით მნიშვნელოვნად უსწრებს, რის გამოც კომპანიამ მისი საჯარო გავრცელება შეაჩერა.

პარალელურად, თეთრი სახლი ექსპერტთა ჯგუფთან კონსულტაციებს ახალი მოდელების სამთავრობო რევიზიის პროცესის დასანერგად იწყებს. მნიშვნელოვანია ითქვას, რომ სახელმწიფო უწყებებს ტექნოლოგიურ კომპანიებთან შედარებით მცირე ფინანსური და ადამიანური რესურსი აქვთ, რაც მოდელების დამოუკიდებელ ტესტირებას აფერხებს.

ცნობისთვის, ხელოვნური ინტელექტის რეგულირების მიმართულებით თეთრი სახლის მკაცრი პოზიცია დონალდ ტრამპის ადმინისტრაციის მიდგომისგან რადიკალურად განსხვავდება. ამ დროისთვის ადმინისტრაციაში აცხადებენ, რომ ნებისმიერი ოფიციალური გადაწყვეტილების შესახებ ინფორმაციას უშუალოდ პრეზიდენტი გააჟღერებს.