"გუდაურის პანორამის"და მიმდებარე ტერიტორიის მოიჯარეს ხელშეკრულება შეუწყდა|ყაზბეგის მერი
“გუდაურის პანორამის” და მიმდებარე ტერიტორიის მოიჯარეს, მოქალაქე ეროსი ელოშვილს ხელშეკრულება შეუწყდა. ამის შესახებ BMG-ის ყაზბეგის მუნიციპალიტეტის მერმა კობა გელაძემ განუცხადა.
საქმე ეხება "გუდაურის პანორამას" და ე.წ. გუდაურის გადმოსახედის მიმდებარე ტერიტორიას, რომელიც ტურისტებისთვის ერთ-ერთი პოპულარული ადგილია, მაგრამ დასუფთავებას და ტურისტული ინფრასტრუქტურის მოწესრიგებას საჭიროებს.
ცნობისთვის: ბიზნესრეესტრის თანახმად, 2024 წელს 6,228 კვ.მ არასასოფლო სამეურნეო მიწის ფართობი, სადაც “გუდაურის პანორამა” მდებარეობს, 5-წლიანი აღნაგობის უფლებით მოქალაქე ეროსი ელოშვილს გადაეცა.
მერის თქმით, ამ დროისთვის 30,000 კვადრატული მეტრის ფართობზე მოქმედი არცერთი საიჯარო ხელშეკრულება არ ირიცხება - მოიჯარეების ნაწილთან კონტრაქტს ვადა გაუვიდა, ნაწილთან კი - შეწყდა.
რატომ შეუწყდა ხელშეკრულება ერთ-ერთ მთავარ მოიჯარეს?
კობა გელაძის ინფორმაციით, “გუდაურის პანორამას” და მიმდებარე ტერიტორიის (6,228 კვ.მ არასასოფლო სამეურნეო მიწის ფართობი) მოიჯარეს, მოქალაქე ეროსი ელოშვილს ხელშეკრულება ოფიციალურად, მიმდინარე წლის 21 მაისს შეუწყდა.
მერის განმარტებით, ხელშეკრულების შეწყვეტის ოფიციალური საფუძველი თავად მოიჯარის მომართვა გახდა, რომლის მიზეზად ჯანმრთელობის მდგომარეობა დაასახელა.
“იურიდიული ფორმით ხელშეკრულება შეწყვეტილია. ამჟამად მიმდინარეობს სამართლებრივი პროცედურები და მიღება-ჩაბარების ეტაპი... გარდა ამისა, მოიჯარეს გაეგზავნა წერილი იმ თანხობრივი და ჯარიმების ვალდებულებების შეხსენებით, რაც მას ხელშეკრულებით ეკისრებოდა,“ - აცხადებს ყაზბეგის მერი.