ჰორმუზი დროებით გაიხსნება, ცეცხლის შეწყვეტა ძალაშია - ჰეგსეთი

აშშ-ის თავდაცვის მდივნის, პიტ ჰეგსეთის განცხადებით, ჰორმუზის სრუტეში კომერციული გემების უსაფრთხოების უზრუნველყოფის მისია დროებით ხასიათს ატარებს. პენტაგონის ხელმძღვანელმა აღნიშნა, რომ ვაშინგტონი სრუტის გახსნის პროცესში მოკავშირეების ჩართულობას ელოდება და პასუხისმგებლობას მათ უახლოეს მომავალში გადააბარებს.

ჰეგსეთმა ხაზგასმით განმარტა, რომ აშშ-ის ძალებმა რეგიონში მძლავრი თავდაცვითი სისტემა შექმნეს, რაც სხვა ქვეყნებისთვის კომერციული ნავიგაციის აღდგენის შესაძლებლობას იძლევა. მისი განმარტებით, აღნიშნული ოპერაცია დამოუკიდებლად მიმდინარეობს და ირანთან ომის, ე.წ. ეპიკური რისხვის ნაწილი არ არის.

ვაშინგტონში მიიჩნევენ, რომ ირანთან მიღწეული ცეცხლის შეწყვეტის შეთანხმება კვლავ მოქმედებს, მიუხედავად იმისა, რომ თეირანმა აშშ-ის ძალებზე თავდასხმები განახორციელა. პიტ ჰეგსეთის თქმით, მას შემდეგ, რაც ზავი გამოცხადდა, ირანმა კომერციულ გემებს ცეცხლი ცხრაჯერ გაუხსნა, ხოლო ამერიკულ შენაერთებზე იერიში ათჯერ მიიტანა.

თავდაცვის უწყების შეფასებით, გამოყენებული მცირე ზომის კატარღები მხოლოდ ცეცხლსასროლი იარაღით იყო აღჭურვილი, ხოლო გაშვებულ ფრთოსან რაკეტებს სამიზნეებისთვის არ მიუღწევიათ. პენტაგონში აცხადებენ, რომ ეს ქმედებები ჯერჯერობით არ სცდება იმ ზღვარს, რაც ფართომასშტაბიანი საბრძოლო მოქმედებების განახლებას გამოიწვევდა.

არსებული ინფორმაციით, ჰორმუზის სრუტის გავლის მოლოდინში ამ დროისთვის 1 550-ზე მეტი კომერციული გემი იმყოფება, რომლებზეც 22 500-ზე მეტი მეზღვაურია განთავსებული. აშშ-ის ცენტრალური სარდლობის გადაწყვეტილებით, სრუტის სამხრეთ ნაწილში უსაფრთხოების გაძლიერებული ზონა შეიქმნა, რომელსაც ამერიკელი სამხედროები იცავენ.