ჰორმუზის სრუტე ისევე იკეტება - დონალდ ტრამპი

აშშ-ის პრეზიდენტმა, დონალდ ტრამპმა ჰორმუზის სრუტეში ბლოკირებული გემების გაყვანის ოპერაცია, სახელწოდებით Project Freedom დროებით შეაჩერა. თეთრი სახლის ლიდერის განცხადებით, ეს გადაწყვეტილება ირანთან მოლაპარაკებების პროცესში მიღწეულმა მნიშვნელოვანმა პროგრესმა განაპირობა. ტრამპმა აღნიშნა, რომ ვაშინგტონსა და თეირანს შორის შეთანხმების მიღწევა კვლავ რეალური გახდა. თუმცა მან ხაზგასმით განაცხადა, რომ ოპერაციის შეჩერების მიუხედავად, ირანის პორტების საზღვაო ბლოკადა კვლავ ძალაში დარჩება.

"პაკისტანისა და სხვა ქვეყნების თხოვნის საფუძველზე, იმ უდიდესი სამხედრო წარმატების გათვალისწინებით, რომელსაც ირანის წინააღმდეგ ჩატარებული კამპანიის დროს მივაღწიეთ, და ასევე იმის გამო, რომ ირანის წარმომადგენლებთან სრული და საბოლოო შეთანხმების მიმართულებით მნიშვნელოვანი პროგრესია მიღწეული - ორმხრივად შევთანხმდით, რომ მიუხედავად იმისა, რომ ბლოკადა სრული ძალითა და ეფექტით დარჩება ძალაში, პროექტი 'თავისუფლება' ჰორმუზის სრუტეში გემების გადაადგილება) დროებით შეჩერდება მოკლე პერიოდით, რათა დადგინდეს, შესაძლებელი იქნება თუ არა შეთანხმების საბოლოოდ დასრულება და ხელმოწერა".

როგორც ირკვევა, ამერიკის შეერთებული შტატების პრეზიდენტმა აღნიშნული ნაბიჯი პაკისტანის თხოვნის საფუძველზე გადადგა. შეგახსენებთ ეს სახელმწიფო ვაშინგტონსა და თეირანს შორის შუამავლის როლს ომის დაწყების დღიდან ასრულებს. საყურადღებოა, რომ ადმინისტრაციის ეს გადაწყვეტილება დროში დაემთხვა სახელმწიფო მდივნის, მარკო რუბიოს იმ განცხადებას, რომლის თანახმადაც ირანში მიმდინარე სამხედრო კამპანია Epic Fury საბოლოოდ დასრულდა. აღსანიშნავია, რომ ოფიციალურმა თეირანმა ვაშინგტონის ეს ნაბიჯი გამარჯვებად უკვე შეაფასა. ირანული მედიის ინფორმაციით, ოპერაციის შეჩერება ტრამპის უკან დახევა და აშშ-ის სტრატეგიული მარცხია.

ცნობისთვის, რეგიონში უსაფრთხოების მდგომარეობა კვლავ არასტაბილურია, რადგან ჰორმუზის სრუტეში ირანმა სავაჭრო გემზე არაერთი თავდასხმა განახორციელა. UKMTO-ს ცნობით, სატვირთო ხომალდს დაუდგენელი ჭურვი მოხვდა. პარალელურად, არაბთა გაერთიანებული საამიროები ირანის მხრიდან რაკეტებითა და დრონებით განხორციელებულ თავდასხმებზე უკვე 2 დღეა საუბრობს. თავის მხრივ, თეირანი აღნიშნულ ბრალდებებს კატეგორიულად უარყოფს. ირანის სამხედრო უწყების განცხადებით, ქვეყანა მსგავსი მოქმედებების განხორციელების შემთხვევაში ამას ღიად დაადასტურებდა.

შეგახსენებთ, რომ აშშ-ისა და ისრაელის იერიშები ირანზე 28 თებერვალს დაიწყო. საპასუხოდ თეირანმა ჰორმუზის სრუტე ჩაკეტა და გლობალური სანავთობო კრიზისი გამოიწვია.