იაპონიის ცენტრალურმა ბანკმა რეფინანსირების განაკვეთი უცვლელად დატოვა, ინფლაციის პროგნოზი კი მკვეთრად გაზარდა

იაპონიის ცენტრალურმა ბანკმა სამშაბათს გამართულ სხდომაზე მონეტარული პოლიტიკის განაკვეთი 0.75%-იან ნიშნულზე დატოვა. გადაწყვეტილებას მხარი საბჭოს 6-მა წევრმა დაუჭირა, ხოლო 3 წევრი რეფინანსირების განაკვეთის 1%-მდე გაზრდას ითხოვდა. მარეგულირებლის განმარტებით, განაკვეთის შენარჩუნების მიზეზი ირანში მიმდინარე ომის ფონზე გაზრდილი რისკებია, რამაც ეკონომიკური ზრდის პროგნოზის შემცირება და ინფლაციური მოლოდინების ზრდა განაპირობა.

არსებული ინფორმაციით, იაპონიის ბანკმა 2026 ფისკალური წლისთვის ეკონომიკური ზრდის პროგნოზი 1%-დან 0.5%-მდე შეამცირა, ხოლო საბაზისო ინფლაციის მოლოდინი 1.9%-დან 2.8%-მდე გაზარდა.

აღსანიშნავია, რომ მარეგულირებლის მიერ დადგენილი ინფლაციის სამიზნე მაჩვენებელი 2%-ს შეადგენს. ბანკის გაფრთხილებით, ახლო აღმოსავლეთში არსებული კრიზისის გამო ნედლ ნავთობზე ფასების მატება კორპორაციულ მოგებასა და შინამეურნეობების რეალურ შემოსავალზე უარყოფით გავლენას იქონიებს, რაც ქვეყნის ეკონომიკურ დინამიკას შეანელებს.

მნიშვნელოვანია ითქვას, რომ მარტში ინფლაციის ტემპი ბოლო ხუთი თვის განმავლობაში პირველად დაჩქარდა და 1.8% შეადგინა. ექსპერტების შეფასებით, იაპონია შესაძლოა მსუბუქი სტაგფლაციის წინაშე აღმოჩნდეს, სადაც ეკონომიკური ზრდის შეჩერება მაღალ ინფლაციასთან იქნება შერწყმული.