IBM-ის აქციები ერთ დღეში 25%-ით დაეცა - რა არის მიზეზი?

ამერიკული ტექნოლოგიური გიგანტის, IBM-ის აქციების ფასი სამშაბათს, ბოლო ათწლეულების განმავლობაში ყველაზე მეტად, 25%-ზე მეტით შემცირდა.

მკვეთრი ვარდნა კომპანიის მიერ მეორე კვარტალის ფინანსური მაჩვენებლების წინასწარ გამოქვეყნებას უკავშირდება, რომლებმაც უოლ-სტრიტის მოლოდინებს მნიშვნელოვნად გადააჭარბა ნეგატიური კუთხით. არსებული ინფორმაციით, საანგარიშო პერიოდში IBM-ის შემოსავალმა $17.2 მილიარდი შეადგინა, რაც წინა პროგნოზებს ჩამორჩება, ხოლო მოგებამ თითო აქციაზე $2.93-ს მიაღწია. მნიშვნელოვანია ითქვას, რომ ანალიტიკოსები კომპანიისაგან $17.86 მილიარდის შემოსავალსა და $3.02-ის მოცულობის მოგებას პროგნოზირებდნენ.

საქმიანობის მიმართულებების მიხედვით, ფინანსური მაჩვენებლების გაუარესება მომხმარებელთა მხრიდან პროგრამული უზრუნველყოფისა და მოწყობილობების შესყიდვების შემცირებამ გამოიწვია. პარალელურად, კლიენტებმა ფინანსური რესურსები ხელოვნური ინტელექტის სერვერებისა და მეხსიერების ბარათების შესყიდვისაკენ მიმართეს, რაც IBM-ის გაყიდვებს ამცირებს.

კომპანიის აღმასრულებელი დირექტორის, არვინდ კრიშნას განმარტებით, IBM-ი მეინფრეიმების მიმართულებით შემოსავლების მცირედით შემცირებას ელოდა, თუმცა რეალური კლება პროგნოზირებულზე გაცილებით მასშტაბური აღმოჩნდა.

ასეთი ნეგატიური შედეგების გამოქვეყნების გამო, დღეს IBM-მა ისტორიაში ერთ-ერთი ყველაზე ნეგატიური შედეგი აჩვენა და მისი კაპიტალიზაცია $204 მილიარდამდე შემცირდა.