IBM-მა მსოფლიოში პირველი 1 ნანომეტრზე მცირე ზომის ჩიპი შექმნა

ამერიკულმა კომპანია IBM-მა ნახევარგამტარების ინდუსტრიაში უმნიშვნელოვანესი ტექნოლოგიური მიღწევის შესახებ გამოაცხადა და მსოფლიოში პირველი 1 ნანომეტრზე მცირე ზომის ჩიპის არქიტექტურა წარადგინა, რომელიც 0.7-ნანომეტრიან ტრანზისტორებზე მუშაობს.

ახალი ტექნოლოგია ფრჩხილის ხელა ფართობზე თითქმის 100 მილიარდი ტრანზისტორის განთავსების შესაძლებლობას იძლევა, რაც ორჯერ აღემატება IBM-ის მიერ 2021 წელს პრეზენტებული 2-ნანომეტრიანი ჩიპის სიმკვრივეს. უახლესი პროცესორი მიზნად ისახავს გამოთვლითი სიმძლავრის მკვეთრ ზრდას ისეთი მიმართულებებისთვის, როგორებიცაა გენერაციული ხელოვნური ინტელექტი, ღრუბლოვანი ინფრასტრუქტურა და მომავალი თაობის ელექტრონული მოწყობილობები.

როგორც ირკვევა, ამ მასშტაბის მიღწევა შესაძლებელი გახდა რევოლუციური, სამგანზომილებიანი სტრუქტურის, სახელწოდებით Nanostack-ის საშუალებით, რაც ინდუსტრიაში ნანოფირებზე ბაზირებულ პირველ 3D დიზაინს წარმოადგენს. ტექნოლოგია ტრანზისტორების ვერტიკალურად განთავსებასა და თითოეულ ფენაში სხვადასხვა მასალის კომბინირების საშუალებას იძლევა, რაც დამოუკიდებლად ოპტიმიზაციას უზრუნველყოფს.

სამეცნიერო ანგარიშების მიხედვით, ახალი ჩიპი 50%-ით მაღალ სიმძლავრეს და 70%-ით მეტ ენერგოეფექტურობას უზრუნველყოფს, ვიდრე არსებული 2-ნანომეტრიანი ანალოგები.

რაც შეეხება ბაზარზე გამოჩენის ვადებს, IBM-ის ნახევარგამტარების განვითარების გეგმა ახალი არქიტექტურის ბაზაზე ინდუსტრიის მინიმუმ ათწლიან პროგრესს ითვალისწინებს. ექსპერტების შეფასებით, 1 ნანომეტრზე მცირე კლასის ჩიპების მასობრივი წარმოების დაწყება და ბაზარზე მათი პირველი კომერციული გამოჩენა უახლოესი 5 წლის განმავლობაშია მოსალოდნელი.