ილიაუნიმ პარლამენტის და მთავრობის წინააღმდეგ საკონსტიტუციოში სარჩელი შეიტანა

საქართველოს საკონსტიტუციო სასამართლოში პარლამენტის და საქართველოს მთავრობის წინააღმდეგ სსიპ "ილიას სახელმწიფო უნივერსიტეტის" სარჩელი დარეგისტრირდა, რომელიც განათლების რეფორმას ეხება.

სსიპ "ილიას სახელმწიფო უნივერსიტეტის", ნინო დობორჯგინიძის, დავით დარჩიაშვილის, სერგო რატიანის და სხვების (სულ 80 მოსარჩელე) სარჩელი ეხება „უმაღლესი განათლების შესახებ“ საქართველოს კანონს და მთავრობის 2026 წლის 12 თებერვლის N55 დადგენილებას „2026-2027 სასწავლო წლისათვის სახელმწიფოს მიერ დაფუძნებულ უმაღლეს საგანმანათლებლო დაწესებულებაში, უმაღლესი საგანმანათლებლო დაწესებულებისა და საგანმანათლებლო პროგრამების (კურიკულუმების) მიხედვით, ერთიანი ეროვნული გამოცდებით/სამაგისტრო გამოცდებით და ერთიანი ეროვნული გამოცდების/სამაგისტრო გამოცდების გავლის გარეშე მისაღებ სტუდენტთა რაოდენობის დამტკიცების შესახებ“.

სასარჩელო მოთხოვნის თანახმად, რიგი ნორმები შეუსაბამობაშია კონსტიტუციის 27-ე მუხლის მე-3 პუნქტთან, რომ „აკადემიური თავისუფლება და უმაღლესი საგანმანათლებლო დაწესებულებების ავტონომია უზრუნველყოფილია“.

სარჩელით დაყენებულია შუამდგომლობა სადავო ნორმის მოქმედების შეჩერების თაობაზე.