ილონ მასკი SEC-თან $1.5-მილიონიან ჯარიმაზე შეთანხმდა

აშშ-ის ფასიანი ქაღალდებისა და ბირჟების კომისია და ილონ მასკი 2022 წელს Twitter-ის შესყიდვასთან დაკავშირებულ სამართლებრივ დავას მორიგებით დაასრულებენ. ორშაბათს სასამართლოში წარდგენილი ოფიციალური დოკუმენტების მიხედვით, ბიზნესმენის სატრასტო ფონდი $1.5 მილიონის ოდენობის სამოქალაქო ჯარიმას გადაიხდის.

მნიშვნელოვანია ითქვას, რომ აღნიშნული შეთანხმების ძალაში შესასვლელად საქმის განმხილველი მოსამართლის საბოლოო ხელმოწერა და თანხმობაა საჭირო, თუმცა საქმით დაინტერესებული იურისტები მოელიან, რომ ეს ეტაპი მარტივად ჩაივლის.

ცნობისთვის, SEC-ი მასკს ფასიანი ქაღალდების შესახებ მოქმედი კანონმდებლობის დარღვევას ედავებოდა. მარეგულირებლის მტკიცებით, მილიარდერმა Twitter-ის აქციების 5%-იანი წილის შეძენის შესახებ სავალდებულო ინფორმაცია დაგვიანებით გაასაჯაროვა. ამ ქმედებამ მასკს საშუალება მისცა, აქციები ხელოვნურად დაბალ ფასად ეყიდა, რამაც სხვა ინვესტორები არახელსაყრელ მდგომარეობაში ჩააყენა.

ბიზნესმენის ადვოკატის, ალექს სპიროს განცხადებით, მიღწეული შედეგი მისი კლიენტის სიმართლეს სრულად ადასტურებს, რადგან, იურისტის განმარტებით, სატრასტო ფონდი მცირე ჯარიმას მხოლოდ ერთი დოკუმენტის წარდგენის ვადის დარღვევის გამო გადაიხდის.

შეგახსენებთ, ილონ მასკმა Twitter-ი 2022 წელს $44 მილიარდად შეიძინა. მოგვიანებით მან პლატფორმას სახელი შეუცვალა და ის SpaceX-ისა და xAI-ის სტრუქტურაში გააერთიანა. პარალელურად, კალიფორნიის სასამართლომ მარტში დაადგინა, რომ ბიზნესმენმა ინვესტორები შესყიდვის პროცესში შეცდომაში შეიყვანა.

ცნობისთვის, SEC-ს ილონ მასკთან დავა 2018 წელსაც ჰქონდა. მაშინ Tesla-ს ხელმძღვანელმა $20 მილიონი გადაიხადა და კომპანიის დირექტორთა საბჭოს თავმჯდომარის პოსტი დატოვა.