ილონ მასკმა OpenAI-ს წინააღმდეგ სასამართლო დავა წააგო
კალიფორნიის ნაფიც მსაჯულთა სასამართლომ ბიზნესმენ ილონ მასკის სარჩელი ორგანიზაცია OpenAI-ისა და მისი ხელმძღვანელის, სემ ოლტმენის წინააღმდეგ არ დააკმაყოფილა.
როგორც ირკვევა, ნაფიცმა მსაჯულებმა გადაწყვეტილება ერთხმად მიიღეს. მათი შეფასებით, მოსარჩელემ სამართლებრივი დავა კანონით განსაზღვრულ ვადაზე გვიან დაიწყო, შესაბამისად, მისი დავის თემა უკვე ხანდაზმული იყო. შეგახსენებთ, მასკი ყოფილ პარტნიორებს OpenAI-ს საქველმოქმედო დანიშნულებასთან დაკავშირებული ხელშეკრულების დარღვევასა და უკანონოდ გამდიდრებაში ადანაშაულებდა.
უფრო ვრცლად რომ ავხსნათ, დავა შეეხებოდა OpenAI-ის თავდაპირველ მისიას. მასკის განცხადებით, მან კომპანიის განვითარებისთვის ადრეულ ეტაპზე $38 მილიონი იმ პირობით გაიღო, რომ სტარტაპი კომერციულ დანიშნულებას არასდროს შეიძენდა. თუმცა, მისი მტკიცებით, ოლტმენმა ბიზნესმენი მოატყუა. მან ორგანიზაციის საწყისი იდეა უარყო და არაკომერციული სტრუქტურა მოგებაზე ორიენტირებულ კომპანიად გადააკეთა. სემ ოლტმენის განცხადებით კი, მილიარდერი თავად სრული კონტროლის მოპოვებას ცდილობდა. მისივე თქმით, მასკი კომპანიის მართვის საკუთარი შვილებისთვის გადაცემასაც კი გეგმავდა, რითაც თავად აპირებდა თავდაპირველი გარიგების დარღვევას.
სასამართლო პროცესი სამი კვირის განმავლობაში მიმდინარეობდა. საქმის განხილვისას ნაფიცმა მსაჯულებმა შიდა მიმოწერები შეისწავლეს და ტექნოლოგიური სექტორის ლიდერების ჩვენებები მოისმინეს. მოწმეთა შორის იყო Microsoft-ის აღმასრულებელი დირექტორი სატია ნადელაც. მასკი დასახელებულ კორპორაციას OpenAI-ის კომერციულ სტრუქტურად გარდაქმნაში დახმარებაში ადანაშაულებდა. სასამართლომ Microsoft-ის წინააღმდეგ არსებული ყველა პრეტენზია უარყო.
ნაფიც მსაჯულთა გადაწყვეტილებას OpenAI-ის წარმომადგენლებმა მართლმსაჯულების გამარჯვება უწოდეს. მათი შეფასებით, ეს სარჩელი მხოლოდ კონკურენტის შეფერხების მცდელობა იყო. როგორც ცნობილია, თავად მასკის კომპანია xAI ხელოვნური ინტელექტის ალტერნატიულ პროექტ "Grok"-ს ავითარებს.
წაგების შემდეგ ილონ მასკმა სოციალურ ქსელ X-ში სასამართლოს ვერდიქტი მკაცრად გააკრიტიკა. მისი განცხადებით, მსაჯულებს საქმის არსებითი მხარე არ განუხილავთ. მასკის ადვოკატები მიღებული ვერდიქტის სააპელაციო სასამართლოში გასაჩივრებას გეგმავენ. სამართალმცოდნეების შეფასებით, ნაფიც მსაჯულთა მიერ ფაქტებზე დაფუძნებული გადაწყვეტილებების ზემდგომ ინსტანციებში შეცვლის შანსი ძალზედ მცირეა.