ინდოეთმა უცხოელი ინვესტორებისთვის ობლიგაციებზე გადასახადები გააუქმა
კაპიტალის რეკორდული გადინებისა და ეროვნული ვალუტის გაუფასურების ფონზე, ინდოეთის ხელისუფლებამ ქვეყანაში უცხოური კაპიტალის მოზიდვის მიზნით, ახალი რეგულაციები აამოქმედა.
არსებული ინფორმაციით, მიღებული განკარგულება უცხოელ ინსტიტუციონალურ ინვესტორებსა და საერთაშორისო ანგარიშსწორების ბანკს სახელმწიფო ფასიანი ქაღალდებიდან მიღებულ საპროცენტო შემოსავალსა და კაპიტალის ნამატზე დაწესებული გადასახადებისაგან სრულად ათავისუფლებს. ოფიციალური უწყებების განცხადებით, აღნიშნული საგადასახადო შეღავათი ძალაში მიმდინარე წლის 1 აპრილიდან რეტროსპექტულად შევიდა.
მნიშვნელოვანია ითქვას, რომ მანამდე უცხოელი ინვესტორები ინდოეთში 12 თვეზე მეტი ვადით შეძენილ აქციებსა და ობლიგაციებზე 12.5%-იან გადასახადს იხდიდნენ, სახელმწიფო ფასიანი ქაღალდებიდან მიღებული საპროცენტო შემოსავალი კი 20%-იანი საშემოსავლო გადასახადით იბეგრებოდა.
პარალელურად, ქვეყნის ცენტრალურმა ბანკმა არარეზიდენტი ინვესტორებისთვის სახელმწიფო ფასიანი ქაღალდების სპექტრი გააფართოვა, ხოლო უცხოური პორტფელური ინვესტიციებისთვის მოკლევადიან განთავსებაზე, კონცენტრაციასა და ცალკეულ ფასიან ქაღალდებზე მანამდე მოქმედი ლიმიტები გააუქმა. ამასთან, ცენტრალურმა ბანკმა გაზარდა საფონდო ბირჟაზე აქციების შესყიდვის კვოტები იმ არარეზიდენტი ინდოელებისა და უცხოეთის მოქალაქეობის მქონე პირებისათვის, რომლებიც რეგისტრაციას ადგილობრივ ფინანსურ რეგულატორში არ გადიან.
როგორც ირკვევა, რეფორმების გატარების მთავარი მიზეზი მიმდინარე წლის დასაწყისიდან ინდოეთის საფინანსო ბაზარზე უცხოელი ინვესტორების მიერ აქტივების მასშტაბური გაყიდვა გახდა.