Intel-მა ირლანდიაში $5.7-მილიარდიანი საინვესტიციო პროექტი დაიწყო

ნახევარგამტარების მწარმოებელმა ამერიკულმა გიგანტმა, Intel-მა ირლანდიის საწარმოო კამპუსის მოდერნიზებისა და ევროპული წარმადობის გაზრდის მიზნით, $5.7 მილიარდის მოცულობის კაპიტალური ინვესტირება დაიწყო.

კომპანიის ინფორმაციით, ეს გადაწყვეტილება მზარდი გლობალური მოთხოვნის დაკმაყოფილებას ისახავს მიზნად. ინვესტიციის უდიდესი ნაწილის განხორციელება 2027 წლის ბოლომდე იგეგმება.

როგორც ირკვევა, პროექტი დუბლინის მახლობლად, ლეიქსლიპში მდებარე საწარმოო სიმძლავრეების მაქსიმალურ გაზრდას ითვალისწინებს, სადაც Intel 3-ის ტიპის ფირფიტები იწარმოება. დაგეგმილი ინფრასტრუქტურული სამუშაოები არსებული ქარხნების ერთიან, მაღალსიჩქარიან საწარმოო გარემოდ გაერთიანებას, კვლევითი საქმიანობის განვითარებასა და პერსონალის გადამზადებას მოიცავს.

ამასთან, მასშტაბური ფინანსური პროგრამა ქვეყანაში დამატებით რამდენიმე ასეული მაღალტექნოლოგიური სამუშაო ადგილის შექმნას უზრუნველყოფს, სადაც ამჟამად 4 900-მდე ადამიანია დასაქმებული.

ცნობისთვის, ირლანდიაში შესვლიდან, 1989 წლიდან, დღემდე, Intel-მა ქვეყნის ეკონომიკაში 30 მილიარდ ევროზე მეტი ინვესტიცია განახორციელა. თავად Intel-ი $518-მილიარდიანი კომპანიაა, რომელსაც წელს 350%-იანი ზრდა აქვს.