ინვესტორები GameStop-ის მიერ eBay-ის შესყიდვას სკეპტიკურად უყურებენ

GameStop-ის აღმასრულებელმა დირექტორმა, რაიან კოენმა, ონლაინ პლატფორმის, eBay-ის შესაძენად $56-მილიარდიანი წინადადება წარადგინა, რომელმაც ანალიტიკოსებისა და ინვესტორების სკეპტიციზმი გამოიწვია, რადგან GameStop-ის საბაზრო ღირებულება $12 მილიარდს შეადგენს, რაც eBay-ის კაპიტალიზაციაზე ოთხჯერ ნაკლებია.

არსებული ინფორმაციით, გარიგება ნახევრად ნაღდი ფულით, ნახევრად კი აქციების გაცვლით უნდა დაფინანსდეს, თუმცა GameStop-ს ამ დროისთვის მხოლოდ $9 მილიარდის ნაღდი ფული და $4.2 მილიარდის ვალი აქვს. დარჩენილი თანხის უდიდესი ნაწილი კი, ინვესტორებისა და ბანკებისგან მოზიდული ვალი უნდა იყოს.

კოენის სტრატეგია eBay-ის მოგებიანობის გაზრდასა და GameStop-ის 1,600-მდე ფიზიკური მაღაზიის ლოგისტიკურ ქსელად გამოყენებას ისახავს მიზნად, რათა კომპანიამ Amazon-ს გაუწიოს კონკურენცია. მიუხედავად ამისა, ინვესტორების ამ პოტენციურ გარიგებას ეჭვით უყურებენ.

Morgan Stanley-ის ანალიტიკოსების შეფასებით, თუ გარიგება განხორციელდა, ეს იქნება ისტორიაში უმსხვილესი შესყიდვა სესხის გამოყენებით, რაც რთულად წარმოსადგენია.

ამასთან, ცნობილმა ინვესტორმა, მაიკლ ბერიმ GameStop-ის ყველა აქცია გაყიდა და აღნიშნა, რომ ეს სტრატეგია მხოლოდ ვალის ზრდასა და აქციების გაუფასურებას გამოიწვევს, რადგან eBay-ს შესასყიდი ფული კომპანიას უბრალოდ არ აქვს.

საერთო ჯამში, უოლ-სტრიტის წარმომადგენლები GameStop-ის წინადადებას სერიოზულად არ განიხილავენ და მას კომპანიის მიმართ საცალო ინვესტორების ინტერესის გაღვივების მცდელობად განიხილავენ.