IPO-ს ფარგლებში SpaceX-ი აქციების 5%-ს თანამშრომლებისთვის გამოყოფს

მსოფლიოს უმდიდრესი ადამიანის, ილონ მასკის აეროკოსმოსურმა კომპანია SpaceX-მა პირველადი საჯარო შეთავაზების ფარგლებში აქციების 5% საკუთარი თანამშრომლებისთვის დაჯავშნა.

როგორც ირკვევა, პირდაპირი აქციების პროგრამის მონაწილეებს ხელმძღვანელები სპეციალური კრიტერიუმებით შეარჩევენ. საჯარო ვაჭრობა Nasdaq-ის ბირჟაზე 12 ივნისს დაიწყება.

რაც შეეხება მიზეზებს, მსგავს გადაწყვეტილებებს დიდი სტარტაპები რამდენიმე კონკრეტული მიზნით იღებენ. უპირველესად, ეს არის ერთგვარი საჩუქარი თანამშრომლებისთვის, რადგან ვიდრე სტარტაპი ბირჟაზე გავა, მათ ექნებათ შესაძლებლობა, აქციები გაცილებით იაფად შეიძინონ, IPO-ს შემდეგ კი პირდაპირ მიიღონ ფინანსური სარგებელი.

ამასთან, ეს გადაწყვეტილება არის ერთგვარი საზომი და გარანტი ინვესტორებისთვის - თუ თანამშრომლები ინვესტირებისაგან თავს იკავებენ, ესე იგი, თავად მათაც კი არ სჯერათ კომპანიის განვითარების. ხოლო, საპირისპირო შემთხვევაში, აღქმაც საპირისპიროა და მიანიშნებს ფირმის სიძლიერესა და პერსპექტიულობაზე.

ცნობისთვის, თანამშრომლებზე ორიენტირებული მსგავსი პირდაპირი პროგრამები წარსულში Airbnb-მ, Uber-მა და Rivian-მაც გამოიყენეს.