ირანი ჰორმუზის სრუტის გახსნის პირობას ასახელებს

ირანმა განაცხადა, რომ მზადაა ჰორმუზის სრუტე შვიდი დღის ვადაში გახსნას, თუ ამერიკის შეერთებული შტატები სამხედრო ზეწოლას შეამცირებს და ირანულ პორტებს ბლოკადას მოუხსნის.

CNBC-ის მიერ ირანის მთავრობის მაღალჩინოსანზე დაყრდნობით გავრცელებულ სტატიაში აღნიშნულია, რომ თეირანმა სრუტეში ნაოსნობის აღდგენის კონკრეტული პირობები უკვე ჩამოაყალიბა და ის ამერიკულ მხარეს წარუდგინა, რომელიც საკითხის განხილვას უკვე შეუდგა.

მნიშვნელოვანია ითქვას, რომ დიპლომატიური ძვრების პარალელურად, თეთრი სახლი თეირანზე ეკონომიკური ზეწოლის გაძლიერებას განაგრძობს. აშშ-ის ფინანსთა მინისტრმა, სკოტ ბესენტმა განაცხადა, რომ ვაშინგტონი ირანული ავიაკომპანიების სრულ ბლოკადას გეგმავს. მისი განმარტებით, ნებისმიერი სუბიექტი, რომელიც ირანულ საჰაერო ხომალდებს საწვავს, მომსახურებას ან ბილეთების რეალიზაციის სერვისს მიაწვდის, დოლარის გლობალური ფინანსური სისტემიდან გაითიშება.

მიუხედავად ეკონომიკური ზეწოლისა, გაეროს სამიტიდან გავრცელებულმა ცნობებმა ვაშინგტონსა და თეირანს შორის დიპლომატიური დიალოგის განახლების იმედები გააჩინა, რამაც ნავთობის ფასების შემცირება გამოიწვია. ამჟამინდელი მდგომარეობით, ამერიკული WTI-ის მარკის ნავთობის 16%-ით არის გაუფასურებული, ხოლო Brent-ის გაიაფების მაჩვენებელი 11%-ს აღწევს.