ხვიჩა კვარაცხელია გინესის მსოფლიო რეკორდების წიგნში შეიყვანეს

"პარი სენ-ჟერმენის" ქართველი შემტევი, ხვიჩა კვარაცხელია, გინესის მსოფლიო რეკორდების წიგნში მოხვდა. გადაწყვეტილება პარიზული კლუბისა და მისი ფეხბურთელების მიერ დამყარებულ 12 ოფიციალურ რეკორდს უკავშირდება, რომელთა შორისაც ერთ-ერთი ხვიჩა კვარაცხელიას ინდივიდუალური მიღწევაა.

უეფას ჩემპიონთა ლიგის ისტორიაში ხვიჩა კვარაცხელიამ ახალი რეკორდი დააფიქსირა: 2026 წლის 25 თებერვლიდან 6 მაისამდე პერიოდში, ქართველმა ფეხბურთელმა ზედიზედ 7 პლეი-ოფის შეხვედრაში მიიღო მონაწილეობა მინიმუმ ერთ საგოლე ეპიზოდში (გოლი ან საგოლე გადაცემა). ეს მაჩვენებელი ტურნირის რეკორდად შეფასდა.

2025-2026 წლების სეზონში ჩემპიონთა ლიგაზე პსჟ-მ რამდენიმე სხვა ისტორიული შედეგიც აჩვენა:

• ყველაზე მეტი გოლი ერთ სეზონში: პარიზელებმა ტურნირის 2025-2026 წლების გათამაშებაში 45 გოლი გაიტანეს, რაც შეჯიბრების რეკორდია. • გადაცემების რაოდენობა: გუნდის ნახევარმცველმა ვიტინიამ ჩემპიონთა ლიგის ერთ გათამაშებაში 1 602 ზუსტი გადაცემა შეასრულა. • ფინალის რეკორდი: 2025 წლის 31 მაისს, მიუნხენში გამართულ ფინალში, პსჟ-მ მილანის "ინტერი" ანგარიშით 5:0 დაამარცხა, რაც ჩემპიონთა ლიგის ფინალების ისტორიაში ყველაზე დიდი სხვაობით გამარჯვებაა. ამავე შეხვედრაში დეზირე დუემ ფინალისთვის სარეკორდო შედეგი დააფიქსირა - 3 საგოლე მოქმედება (2 გოლი და 1 შედეგიანი გადაცემა).

პარალელურად, გინესის რეკორდების წიგნში შევიდა პსჟ-ის მიღწევები საფრანგეთის შიდა ჩემპიონატში: პსჟ ყველაზე ტიტულოვანი კლუბია მოპოვებული 14 ტიტულით და ერთ სეზონში დაგროვილი სარეკორდო 96 ქულით. გუნდს ეკუთვნის ზედიზედ მოგებული 14 მატჩის, ასევე 36-მატჩიანი საერთო და 39-მატჩიანი გასვლითი დაუმარცხებელი სერიები, ინდივიდუალურ დონეზე კი ლიგა 1-ის რეკორდსმენები მარკინიოსი (11 საჩემპიონო ტიტული) და ფაბიან რუისი (51 წაუგებელი შეხვედრა) გახდნენ.

აღნიშნული 12 გუნდური და ინდივიდუალური მიღწევის საფუძველზე, "პარი სენ-ჟერმენი" და მისი ფეხბურთელები ოფიციალურად დარეგისტრირდნენ გინესის მსოფლიო რეკორდების წიგნში.