ირანის ომის ფონზე Ryanair-ის მოგება 34%-ით შემცირდა

ევროპული საავიაციო ინდუსტრიის გიგანტმა, Ryanair-მა პირველი კვარტალის ფინანსური ანგარიში წარმოადგინა, რომლის მიხედვითაც ავიაკომპანიის წმინდა მოგება გასული წლის ანალოგიურ პერიოდთან შედარებით 34%-ით შემცირდა და €538 მილიონი ($615.3 მლნ.) შეადგინა. როგორც ირკვევა, თუ გასული წლის ანალოგიურ პერიოდში კომპანიამ €820 მილიონი მიიღო, ამჯერად ფინანსურმა მაჩვენებელმა მნიშვნელოვნად იკლო.

როგორც კომპანიაში აღნიშნავენ, ამის მთავარი მიზეზი იყო მიმდინარე წლის აპრილი-ივნისის შუალედში ახლო აღმოსავლეთის კრიზისის გამწვავება გახდა, რის ფონზეც მომხმარებლების დიდმა ნაწილმა ჯავშნები ან გააუქმა ან გადაავადა. მოთხოვნის სტიმულირებისთვის, ავიაკომპანიას ბილეთების ფასის 6%-ით შემცირება მოუწია, რამაც უარყოფითად იმოქმედა შემოსავლებზე. ამასთან, გაორმაგდა იმ საავიაციო საწვავის ფასიც, რომელიც კომპანიის დაუზღვეველი მარაგების 20%-ს შეადგენს. საბოლოოდ, ბოლო 3 თვეში კომპანიას საოპერაციო ხარჯების 11%-ით, €3.81 მილიარდამდე გაზრდა მოუწია.

მნიშვნელოვანია ითქვას, რომ მეორე კვარტალში ბილეთების ფასების კლების ტენდენცია ნარჩუნდება, თუმცა კომპანიაში აღნიშნავენ, რომ წლის მეორე ნახევრის შესახებ პროგნოზის გაჟღერება ჯერ ისევ ნაადრევია.

საყურადღებოა, რომ ანგარიშის გამოქვეყნების შემდეგ, ევროპული სავაჭრო სესიის გახსნისთანავე, Ryanair-ის აქციების ფასი 5.6%-ით შემცირდა. ამჟამად ერთი აქცია $60.41-ად იყიდება, ავიაკომპანიის საბაზრო კაპიტალიზაცია კი $25.7 მილიარდს შეადგენს.