ირანის პრეზიდენტი აიათოლა მოჯთაბა ხამენეის პირისპირ შეხვდა

ირანის პრეზიდენტმა, მასუდ ფეზეშქიანმა ქვეყნის ახალ უზენაეს ლიდერთან, აიათოლა მოჯთაბა ხამენეისთან პირისპირ შეხვედრა გამართა. ადგილობრივი მედიის ინფორმაციით, ორსაათნახევრიანი აუდიენციისას მხარეებმა ქვეყნის ხელმძღვანელობის სტრუქტურაში ერთიანობის, ნდობისა და სოლიდარობის განმტკიცების საკითხები განიხილეს.

ფეზეშქიანის განცხადებით, უზენაესი ლიდერის უშუალო და ღია დამოკიდებულება მართვის სისტემისთვის მისაბაძი მოდელი უნდა გახდეს. შეხვედრის სხვა კონკრეტულ დეტალებზე პრეზიდენტს კომენტარი არ გაუკეთებია.

აღსანიშნავია, რომ მარტში გამართული ინაუგურაციის შემდეგ, რომელსაც აშშ-ისა და ისრაელის დარტყმების შედეგად აიათოლა ალი ხამენეის დაღუპვას მოჰყვა, მოჯთაბა ხამენეი ქვეყნის პოლიტიკურ ცხოვრებაში პირველად გამოჩნდა. აქამდე მისი ყველა განცხადება მხოლოდ სახელმწიფო ტელევიზიის ეთერით ვრცელდებოდა, რამაც ლიდერის ადგილსამყოფელისა და ჯანმრთელობის მდგომარეობის შესახებ არაერთი კითხვა გააჩინა.

პარალელურად, თეირანი ვაშინგტონისგან ომის დასრულების შესახებ ოფიციალურ წინადადებას ელოდება, რომელზედაც პასუხს ირანული მხარე დღეს გასცემს. ამერიკული გეგმა საბრძოლო მოქმედებების შეწყვეტასა და 30-დღიანი მოლაპარაკებების დაწყებას ითვალისწინებს, რაც ბირთვულ პროგრამას, გაყინულ აქტივებსა და ჰორმუზის სრუტის უსაფრთხოებას უკავშირდება. CNN-ის ცნობით, აშშ ურანის გამდიდრებაზე 10-წლიანი მორატორიუმის დაწესებასა და გამდიდრებული მარაგების ქვეყნიდან გატანას მოითხოვს. დონალდ ტრამპმა უკვე განაცხადა, რომ შეთანხმების მიუღწევლობის შემთხვევაში, ირანის დაბომბვა კვლავ განახლდება.