ირანმა სახელმწიფო უწყებებს უცხოური სოციალური ქსელებით სარგებლობის აკრძალვა მოუხსნა
ირანის ხელისუფლებამ სახელმწიფო სტრუქტურებისთვის უცხოური სოციალური ქსელებისა და შეტყობინებების პლატფორმების ოფიციალური გამოყენების თითქმის ათწლიანი აკრძალვა გააუქმა.
ახალი გადაწყვეტილების თანახმად, სამთავრობო დაწესებულებებს უცხოურ ციფრულ პლატფორმებზე ოფიციალური სიახლეებისა და საჯარო ინფორმაციის გამოქვეყნების უფლება კვლავ მიეცემათ.
ეს სიახლე ირანის პირველი ვიცე-პრეზიდენტის ადმინისტრაციის კომუნიკაციებისა და ინფორმაციის დეპარტამენტის ხელმძღვანელის მოადგილემ, აბას ფაზოუქიმ საინფორმაციო სააგენტო ISNA-სთან საუბრისას გააჟღერა. აღსანიშნავია, რომ ხელისუფლებას ახალი რეგულაციის იმპლემენტაციის კონკრეტული მექანიზმები ჯერ არ გაუსაჯაროებია. შესაბამისად, მთავრობას ჯერ არ დაუსახელებია ის კონკრეტული უწყებები, რომლებიც უცხოური არხებით სარგებლობას პირველ ეტაპზე დაიწყებენ.
საყურადღებოა, რომ ოფიციალური თეირანი რიგითი მოქალაქეებისთვის უცხოურ სოციალურ ქსელებზე წვდომის შესაძლო შემსუბუქების შესახებ ჯერჯერობით არაფერს ამბობს.
შეგახსენებთ, ირანმა სახელმწიფო სტრუქტურებისთვის უცხოური შეტყობინებების აპლიკაციებითა და სოციალური ქსელებით სარგებლობა 2017 წელს შეზღუდა, სრული აკრძალვა კი 2018 წელს დააწესა. მას შემდეგ საჯარო სტრუქტურები ოფიციალური კომუნიკაციისთვის მხოლოდ ადგილობრივ ციფრულ სერვისებს იყენებდნენ.
BM.GE
წყარო: bm.ge