ირანში ომით გამოწვეული მელნის დეფიციტის გამო, იაპონური პროდუქტის შეფუთვა შავ-თეთრი ხდება

იაპონიაში ზოგიერთი ხემსის შეფუთვა შავ-თეთრი ხდება. ამის მიზეზი ირანის ომია, რომელმაც ფერადი მელნის დასამზადებლად საჭირო ინგრედიენტის მიწოდება შეაფერხა.

ტოკიოში ბაზირებული კომპანია Calbee Inc., რომელიც კარტოფილის ჩიფსებსა და ბურღულეულს აწარმოებს, აცხადებს, რომ შეფუთვის შიგთავსი უცვლელი რჩება. Calbee-ს პოპულარული სნექები იაპონიის ფაქტობრივად ყველა მაღაზიაში იყიდება და ექსპორტზე აშშ-ში, ჩინეთსა და ავსტრალიაში გადის.

"ეს ზომა პროდუქციის სტაბილური მიწოდების შენარჩუნებას ემსახურება", - ნათქვამია კომპანიის მიერ გავრცელებულ განცხადებაში.

ცვლილება, რომელიც 25 მაისიდან ამოქმედდება, კომპანიის 14 პროდუქტს შეეხება და მელნის ფერებს მხოლოდ ორამდე შეზღუდავს. 1949 წელს დაარსებულმა კომპანიამ (რომელიც 5 000-ზე მეტ ადამიანს ასაქმებს) აღნიშნა, რომ ეს გადაწყვეტილება ცვალებადი გეოპოლიტიკური პირობების მიმართ მოქნილი რეაგირებისთვის იყო საჭირო. ჯერჯერობით უცნობია, რა დრომდე შენარჩუნდება ეს ცვლილება.

ეს ნაბიჯი კიდევ ერთხელ უსვამს ხაზს იმ პრობლემებს, რომლებსაც კომპანიები ახლო აღმოსავლეთში მიმდინარე ომისა და ჰორმუზის სრუტის ჩაკეტვის გამო ნავთობისა და სხვა პროდუქტების ფასების ზრდისა და დეფიციტის სახით აწყდებიან.

იაპონიამ, რომელიც ნავთობის მოთხოვნილებას თითქმის სრულად იმპორტით იკმაყოფილებს, ჯერჯერობით შედარებით მშვიდად გადაიტანა კრიზისი. მთავრობა ცდილობს, შიშები ქვეყნის ნავთობის რეზერვებზე ხაზგასმით გააქარწყლოს.

თუმცა, პრობლემად რჩება ნაფტის - ნავთობისგან მიღებული პროდუქტის - დეფიციტი, რომელიც პლასტმასისა და მელნის დასამზადებლად გამოიყენება.

ჩიფსების შეფუთვაში თვალშისაცემი ცვლილება შეუმჩნეველი არ დარჩება. Calbee-ს მსუბუქად დამარილებული ჩიფსები (ცნობილი როგორც "usu shio") აქამდე ღია ნარინჯისფერ შეფუთვაში იყიდებოდა, რომელზეც ყვითელი ჩიფსები და ქუდიანი კარტოფილის-კაცუნას მასკოტი იყო გამოსახული. ახალ შეფუთვაზე კი მხოლოდ მონოქრომული (ერთფეროვანი) წარწერები იქნება.

კომპანიამ, რომელიც ასევე აწარმოებს კრევეტების ჩიფსებს ("kappa ebisen"), სულ ცოტა ხნის წინ, მარტში, ამბიციური ზრდის სტრატეგია დააანონსა.

"Calbee გააგრძელებს მოქნილ და სწრაფ რეაგირებას საოპერაციო გარემოს ცვლილებებზე, მათ შორის გეოპოლიტიკურ რისკებზე, და ერთგული რჩება თავისი ვალდებულებისა - უზრუნველყოს უსაფრთხო, მაღალი ხარისხის პროდუქციის სტაბილური მიწოდება. გთხოვთ, გაგებით მოეკიდოთ ამ სიტუაციას", - ნათქვამია კომპანიის განცხადებაში.