იტალიის ყველა დიდ ქალაქში უკიდურესი სიცხის გამო საფრთხის უმაღლესი, წითელი დონე გამოცხადდა

იტალიაში ანომალიური სიცხის ტალღის გაძლიერების ფონზე, ქვეყნის 27-ვე მსხვილ ქალაქში დღეს საფრთხის უმაღლესი, წითელი დონე გამოცხადდა. ამის შესახებ ქვეყნის ჯანდაცვის სამინისტრო იუწყება.

სამშაბათსა და ოთხშაბათს „წითელი დონე“ 25 ქალაქში მოქმედებდა, ხუთშაბათიდან კი განგაშის მაქსიმალურ ნიშნულზე გადავიდა დარჩენილი ორი ქალაქიც მესინა და რეჯო-კალაბრია.

ჯანდაცვის სამინისტროს წარმომადგენლის განცხადებით, ეს მიმდინარე წელს პირველი შემთხვევაა, როდესაც წითელი დონე ერთდროულად 27-ვე ქალაქში გამოცხადდა.

„წითელი დონე“ მიუთითებს ჯანმრთელობის შესაძლო საგანგებო მდგომარეობაზე, როდესაც ხანგრძლივი მაღალი ტემპერატურა სერიოზულ საფრთხეს უქმნის მთელ მოსახლეობას, მათ შორის ახალგაზრდებსა და ჯანმრთელ ადამიანებს.

ადგილობრივი ხელისუფლება მცხოვრებლებს მოუწოდებს, დღის ყველაზე ცხელ მონაკვეთში 11:00-დან 18:00 საათამდე მოერიდონ მზის პირდაპირ სხივებსა და გარეთ ყოფნას, დარჩნენ შენობებში და მიიღონ დიდი რაოდენობით სითხე.

იტალიის ზოგოერთ რეგიონში ტემპერატურამ 40 გრადუსს მიაღწია. სინოპტიკოსების ცნობით, სიცხის ტალღას ჩრდილოეთ აფრიკული ანტიციკლონი იწვევს, რომელიც ხმელთაშუა ზღვის აუზში გაძლიერდა და ევროპის დიდ ნაწილზე გავრცელდა. ტემპერატურის კლებას უქმეებამდე არ ელოდებიან.