საქართველოში ცოცხალი მცენარეების იმპორტი 15.7%-ით გაიზარდა - სად ვყიდულობთ?

საქართველოში ცოცხალი მცენარეების იმპორტი იზრდება. 2026 წლის იანვარ-ივლისში ქვეყანაში 26.3 მილიონი დოლარის ღირებულების ცოცხალი მცენარეები შემოვიდა, რაც გასული წლის ანალოგიურ პერიოდთან შედარებით 15.7%-ით მეტია. მაშინ როცა 2025 წლის პირველ შვიდ თვეში იმპორტის ღირებულება 22.8 მილიონ დოლარს შეადგენდა.

იმპორტის ზრდა მიუთითებს, რომ საქართველოში ცოცხალ მცენარეებზე მოთხოვნა კვლავ მაღალია, ხოლო ადგილობრივი ბაზარი მნიშვნელოვანწილად უცხოურ მიწოდებაზეა დამოკიდებული.

მიმდინარე წლის იანვარ-ივლისში ყველაზე დიდი მოცულობის იმპორტი იტალიიდან განხორციელდა - 8.2 მილიონი დოლარის. მეორე ადგილზეა თურქეთი, საიდანაც ქვეყანაში 6.5 მილიონი დოლარის ცოცხალი მცენარე შემოვიდა, მესამეზე კი ესპანეთია - 4.3 მილიონი დოლარით. მნიშვნელოვანი წილი აქვს ნიდერლანდებსაც, საიდანაც იმპორტმა 3.1 მილიონი დოლარი შეადგინა.

ამ ოთხ ქვეყანაზე ჯამურად 22.1 მილიონი დოლარი, ანუ ცოცხალი მცენარეების მთლიანი იმპორტის დაახლოებით 84% მოდის. ეს ნიშნავს, რომ საქართველოს ბაზარი ამ მიმართულებით რამდენიმე ევროპულ და რეგიონულ მომწოდებელზეა მნიშვნელოვნად კონცენტრირებული.

დანარჩენი იმპორტის ძირითადი წყაროებია პოლონეთი - 972 ათასი დოლარი, სერბეთი - 630 ათასი დოლარი, აშშ - 590 ათასი დოლარი, ბელგია - 511 ათასი დოლარი, საფრანგეთი - 359 ათასი დოლარი და სომხეთი - 278 ათასი დოლარი.

საყურადღებოა, რომ ჩამოთვლილი 10 ქვეყნისგან შემოსული პროდუქციის ღირებულება დაახლოებით 25.4 მილიონ დოლარს შეადგენს, რაც მთლიანი იმპორტის დაახლოებით 97%-ია. შესაბამისად, ბაზრის ძირითადი ნაწილი სწორედ ამ მომწოდებელ ქვეყნებზე მოდის.