Jeep-მა 419 035 ავტომობილი გამოიხმო

Jeep-მა Grand Cherokee-ის სამოდელო რიგის 419 035 ავტომობილის უკან გაწვევის გადაწყვეტილება მიიღო. აშშ-ის გზატკეცილების მოძრაობის უსაფრთხოების ეროვნული ადმინისტრაციის ინფორმაციით, ხარვეზი გვერდით უსაფრთხოების ბალიშებს უკავშირდება. როგორც ირკვევა, პროგრამული შეცდომის გამო, ავარიის დროს აღნიშნული ბალიშები, შესაძლოა, მომენტალურად არ გაიხსნას, რაც მგზავრების დაზიანების რისკს ზრდის.

მწარმოებელი ავტომობილების მფლობელების ინფორმირების პროცესს 11 ივნისიდან დაიწყებს, ავტორიზებული სერვისცენტრები კი მგზავრთა უსაფრთხოების კონტროლერის პროგრამულ უზრუნველყოფას განაახლებენ.

არსებული ინფორმაციით, გაწვევა ძირითადად Grand Cherokee L-ის მოდელებს ეხება, რომელთა რაოდენობაც 278 905 ერთეულს შეადგენს, დანარჩენი 140 130 ავტომობილი კი სტანდარტული Grand Cherokee-ია.

დოკუმენტაციის თანახმად, გაწვევის პროგრამაში 2022-2026 წლებში გამოშვებული Grand Cherokee და 2023-2025 წლების მოდელების Grand Cherokee L მოხვდა. სისტემური ხარვეზის გააქტიურების შემთხვევაში, ავტომობილის მაჩვენებელთა დაფაზე უსაფრთხოების ბალიშის ინდიკატორი მუდმივად აინთება.

მნიშვნელოვანია ითქვას, რომ კომპანიას მძღოლებისთვის ავტომობილების მართვის აკრძალვის რეკომენდაცია არ გაუცია, პროგრამული განახლება კი სრულიად უფასოდ განხორციელდება.