კალიფორნიის ოლქმა Meta-ს თაღლითური რეკლამების გამო უჩივლა

კალიფორნიის სანტა-კლარას ოლქმა ტექ-ინდუსტრიის გიგანტ Meta-ს წინააღმდეგ სასამართლოში სარჩელი შეიტანა. როგორც ირკვევა, კომპანიას Facebook-სა და Instagram-ზე თაღლითური რეკლამების განთავსებით მოგების მიღებაში ადანაშაულებენ.

სარჩელის მიხედვით, აღნიშნული ქმედება კალიფორნიის შტატის ყალბი რეკლამირების შესახებ კანონმდებლობას ეწინააღმდეგება. ოლქი მიყენებული ზარალის ანაზღაურებას, ასევე სამოქალაქო ჯარიმების გადახდას და მსგავსი ბიზნესპრაქტიკის სამუდამოდ აკრძალვას ითხოვს.

არსებული ინფორმაციით, Meta-მ თაღლითური სარეკლამო კამპანიებიდან ბოლო წლებში ყოველწლიურად თითქმის $7 მილიარდი შემოსავალი მიიღო. სარჩელში აღნიშნულია, რომ კომპანია ხელოვნურ ინტელექტსა და მიზნობრივი რეკლამის ტექნიკას დაუცველი მომხმარებლების თაღლითებთან დასაკავშირებლად იყენებდა. სანტა-კლარას ოლქის მტკიცებით, Meta-მ ფინანსური მიზნების მისაღწევად მომხმარებელთა უსაფრთხოება დააიგნორირა. ის ნაცვლად თაღლითობის შემცირებისა, ამ პროცესის ხელშემშლელ ბარიერებს თავადვე ბლოკავდა.

აღსანიშნავია, რომ Meta წარდგენილ ბრალდებებს უარყოფს და სარჩელს უსაფუძვლოს უწოდებს. კომპანიის წარმომადგენლის განმარტებით, მათ გასულ წელს 159 მილიონზე მეტი თაღლითური რეკლამა წაშალეს. ტექ-გიგანტში აცხადებენ, რომ აპირებენ სამართალდამცავ ორგანოებთან თანამშრომლობას და ყველაფერს გააკეთებენ, რათა მომხმარებელთა ინტერესები ახალი კონტროლის მექანიზმების შემოღებით დაიცვან. კომპანიაში უკვე განაცხადეს, რომ ოლქის მიერ წარდგენილი პრეტენზიები არარეალურია და სასამართლოში საკუთარ პოზიციებს აუცილებლად დაიცავენ.

სანტა-კლარას ოლქმა თავისი ინტერესების დასაცავად რამდენიმე იურიდიული ფირმა დაიქირავა. მნიშვნელოვანია ითქვას, რომ საბოლოო გადაწყვეტილებას უშუალოდ ოლქის ადმინისტრაცია მიიღებს. სარჩელი კალიფორნიის ყველა რეზიდენტის სახელით არის შეტანილი და ტექნოლოგიური პლატფორმების პასუხისმგებლობის გაზრდას ისახავს მიზნად.

შეგახსენებთ, რომ Meta-ს წინააღმდეგ მსგავსი ბრალდებები გასულ წელს გამოქვეყნებულ ჟურნალისტურ გამოძიებაშიც გაჟღერდა. ცნობისთვის, სანტა-კლარა კალიფორნიის ერთ-ერთი უმსხვილესი ოლქია, სადაც ტექნოლოგიურ სექტორში მომუშავე მრავალი კომპანიაა რეგისტრირებული.