კარგი იქნებოდა, გადაწყვეტილების მიღებამდე კონსულტაცია დარგთან გაევლოთ|”თბილღვინო” ვენახების გაშენების რეგულირებაზე
ვიდრე გადაწყვეტილებებს მიიღებდნენ, სასურველი იქნებოდა რომ დარგთან გაევლოთ კონსულტაციები - ამის შესახებ კომპანია „თბილღვინოს“ დამფუძნებელი გიორგი მარგველაშვილი კომერციული ვენახების რეგულირების საკითხზე აცხადებს.
ბიზნესმენი მიიჩნევს, რომ ნებისმიერი საკანონმდებლო ცვლილება, რომელიც დარგის მომავალს განსაზღვრავს, კერძო სექტორსა და სახელმწიფოს შორის მჭიდრო დიალოგის პირობებში უნდა ჩამოყალიბდეს.
„მე ვფიქრობ, ნებისმიერი ინიციატივა უნდა შეფასდეს მიზნობრიობიდან. ჩვენ კარგად უნდა გავაანალიზოთ რა არის მიზანი და თუ მიზანი არის, რომ საქართველოში უფრო მაღალი ხარისხის ღვინო იწარმოებოდეს, ამ მიზანს ჩვენ შეიძლება მივაღწიოთ სხვადასხვა გზებით და შეიძლება იყოს განხილული სხვადასხვა ინსტრუმენტები.
სანამ ამ გადაწყვეტილებებს მიიღებენ, ალბათ, სასურველი იქნებოდა, რომ როგორც ხდებოდა ტრადიციულად, მომხდარიყო დარგთან აქტიური კონსულტაციები, მსჯელობები, აზრთა გაცვლა-გამოცვლა, იმიტომ რომ ჩვენ ყველას გვაერთიანებს ერთიანი მიზანი. ჩვენ ყველანი დაინტერესებულები ვართ რომ საქართველოდან გასული ღვინო იყოს შესაფერისი ხარისხის, თუმცა ამის გზები შეიძლება იყოს განსხვავებული და ამას სჭირდება მსჯელობა“ - აცხადებს გიორგი მარგველაშვილი.
კითხვაზე - თავად რა იდეებს გაუზიარებდა დარგის რეგულირებასთან დაკავშირებით ხელისუფლების წარმომადგენლებს, მარგველაშვილი BMG-ს პასუხობს:
„კარგი იქნებოდა, რომ ეს აქამდე მომხდრიყო, მაგრამ ჩემი აზრით, დაგვიანებული არ არის, რომ ახლა მოხდეს - დარგის მარეგულირებელი და დარგის წარმომადგენლები დასხდნენ ერთად, იმსჯელონ და მსჯელობაში დაიბადება ჭეშმარიტება.
მე მესმის, რომ ქართული ღვინო საკმაოდ მაღალი ხარისხის საფეხურზე დგას დღეს... იზრდება ქართული ღვინის პოპულარობა და გავრცელება, რეალიზაცია სხვადასხვა ქვეყნებში. შესაბამისად, ეს მიზანი გარკვეულწილად მიღწეულია, თუმცა შეიძლება რა თქმა უნდა დამატებითი ინიციატივებიც გაზიარდეს, რათა ეს მაღალი საფეხურის ხარისხი შენარჩუნდეს და კიდევ უფრო გაიზარდოს“ - ამბობს გიორგი მარგველაშვილი.