"კერძო და საჯარო თანამშრომლობის ახალი მოდელი შეიქმნა" - ვანო ზარდიაშვილი ურბნისის ქვესადგურზე
„საქართველოს სახელმწიფო ელექტროსისტემის“ გენერალური დირექტორი ვანო ზარდიაშვილი ამბობს, რომ ურბნისის ქვესადგურთან დაკავშირებით კერძო-საჯარო თანამშრომლობა ახალი მოდელია, რის შედეგადაც ელექტროსისტემა 20 მილიონ ლარს დაზოგავს. მან ამის შესახებ მემორანდუმის ხელმოწერის შემდეგ განაცხადა.
საქმე ისაა, რომ ვანო ზარდიაშვილმა და ექვსი კერძო ენერგოკომპანიის წარმომადგენელმა ხელი მოაწერეს ურთიერთშეთანხმების მემორანდუმს, რომელიც ქვესადგური „ურბნისის“ ერთობლივ პროექტირებასა და მშენებლობას ითვალისწინებს. დაგეგმილია 220 კილოვოლტიანი ქვესადგურის მშენებლობა, რომელიც უზრუნველყოფს ქარის, მზისა და ჰიდროელექტროსადგურებიდან გამომუშავებული ელექტროენერგიის გადამცემ ქსელში ინტეგრაციას. შეთანხმების მიხედვით, კომპანიები საკუთარი ხარჯებით უზრუნველყოფენ სხვადასხვა ტექნიკური მოწყობილობის შეძენასა და მიწოდებას, ხოლო „საქართველოს სახელმწიფო ელექტროსისტემა“ განახორციელებს ქვესადგურის პროექტირებას, სამშენებლო და სამონტაჟო სამუშაოებს.
"დღევანდელი დღე იყო უპრეცედენტო, სადაც კერძო და საჯარო თანამშრომლობის ახალი მოდელი შეიქმნა. ხელი მოვაწერეთ მემორანდუმს, სადაც დაიგეგმა ურბნისის ქვესადგურის ერთობლივად მშენებლობა. დაახლოებით 20 მილიონ ლარს დაზოგავს „საქართველოს სახელმწიფო ელექტროსისტემა“ და ამ ხარჯს გაწევს ბიზნესი. ურბნისის ქვესადგური არის ერთ-ერთი უმნიშვნელოვანესი გენერაციის წყაროების დასაერთებლად და ვფიქრობთ, რომ მსგავსი პრაქტიკა ცალსახად დასანერგია, სადაც ორივე მხარე გამოხატავს კმაყოფილებას და მზაობას",- ამბობს ვანო ზარდიაშვილი.