ხანძარი ვარშავაში: Ford-ის 3 200 კვ.მ-ის ავტოსალონი და სახელოსნო სრულად დაიწვა

პოლონეთის დედაქალაქში Ford-ის ოფიციალური დილერისა და სერვისცენტრის ტერიტორიაზე გაჩენილმა ხანძარმა ინფრასტრუქტურა და ათეულობით ავტომობილი გაანადგურა. შემთხვევის შედეგად არავინ დაშავებულა, თუმცა მატერიალური ზარალი დიდია.

ინციდენტი ვარშავის ჩრდილო-აღმოსავლეთით, ტარგუვეკის (Targówek) რაიონში, კრასნობროდსკას ქუჩაზე მოხდა. ადგილობრივმა მცხოვრებლებმა განგაში დილის 05:00 საათის შემდეგ ატეხეს, როდესაც ტერიტორიიდან შავი კვამლი გამოჩნდა, რომელიც კილომეტრების მანძილზე ჩანდა. ადგილზე 40-მდე სახანძრო-სამაშველო ეკიპაჟი გაგზავნეს. ოპერაციაში ჩაერთნენ ქიმიური უსაფრთხოების სპეციალური ჯგუფები, ამწე პლატფორმები და სადაზვერვო დრონები.

სახელოსნოში არსებული ზეთების, საბურავებისა და საღებავების აალების გამო, ტოქსიკური კვამლის გავრცელების სერიოზული რისკი შეიქმნა. პოლონეთის უსაფრთხოების სამთავრობო ცენტრმა (RCB) მოსახლეობას სპეციალური SMS გაფრთხილებები გაუგზავნა, კერძოდ, ადგილობრივებს მოუწოდეს, არ გაეღოთ ფანჯრები და მორიდებოდნენ ღია ცის ქვეშ ყოფნას.

ცეცხლმა სრულად მოიცვა Ford Auto Nataniel-ის 3 200 კვადრატული მეტრის ფართობის შოურუმი და ავტოსახელოსნო. ხანძრის გამო შენობის სახურავის ნაწილი ჩამოინგრა. განადგურებულია შენობის გარეთ, ღია სადგომზე პარკირებული 10-ზე მეტი ავტომობილიც.

ვინაიდან ხანძარი სამუშაო საათების დაწყებამდე გაჩნდა, შენობაში ადამიანები არ იმყოფებოდნენ. ოფიციალური მონაცემებით, ინციდენტს მსხვერპლი არ მოჰყოლია, ასევე დაშავებულიც არავინაა. ხანძრის გამომწვევი ზუსტი მიზეზების დასადგენად გამოძიება მიმდინარეობს.

Ford Auto Nataniel-ის აღნიშნული სერვისცენტრი და ავტოსალონი ვარშავაში, კრასნობროდსკას ქუჩაზე, 1998 წელს გაიხსნა. ის პოლონეთის დედაქალაქში Ford-ის ერთ-ერთი ყველაზე ხანგრძლივად მოქმედი, ავტორიზებული სადილერო ცენტრი იყო, რომელიც 25 წელზე მეტი ხნის განმავლობაში ემსახურებოდა როგორც კერძო მომხმარებლებს, ისე მსხვილ კორპორაციულ კლიენტებს.