ხშირად კომპანიები საკუთარ გამოცდილებებში იხარშებიან, ასეთ შეხვედრებზე კი იდეებს უზიარებენ, რასაც უკეთესი შედეგი ექნება - ლევან სუმბაძე

"ხშირ შემთხვევებში კომპანიები საკუთარ გამოცდილებებში იხარშებიან, ასეთ შეხვედრებზე კი იდეებს უზიარებენ, რასაც უკეთესი შედეგი ექნება", - ამის შესახებ კომპანია Brandhand-ის პარტნიორმა ლევან სუმბაძემ Industry Talks-ის ღონისძიებაზე BMG-სთან განაცხადა.

შეგახსენებთ, რომ დღეს, BDO Digital-ისა და "ბიზნეს მედია საქართველოს" (BMG) პარტნიორობით, მასშტაბური B2B პლატფორმის – Industry Talks-ის სადებიუტო ღონისძიება იმართება, რომელიც სრულად საცალო ვაჭრობის (რიტეილ) სექტორის ციფრულ ტრანსფორმაციას ეთმობა.

დარგის ლიდერები თანხმდებიან, რომ სწრაფად ცვალებად ბიზნესგარემოში ტექნოლოგიური ადაპტაცია, ოპერაციების გაციფრულება და კოლეგების გამოცდილებასა თუ შეცდომებზე სწავლა კომპანიების მდგრადობის უმთავრესი წინაპირობაა.

BDO-ს მენეჯმენტის წარმომადგენლები BMG-სთან იმ მიზნებსა და გამოწვევებზე საუბრობენ, რომელთა ირგვლივაც ახალი პლატფორმა შეიქმნა.

BDO საქართველოს მმართველი პარტნიორი მაია ხაჩიძე ყურადღებას იმ სწრაფ ცვლილებებზე ამახვილებს, რომელთა წინაშეც დღეს ბიზნესი დგას. მისი თქმით, Industry Talks-ის მთავარი მისიაა, კომპანიებს სხვის შეცდომებსა და გამოცდილებაზე სწავლის გზით, ადაპტაციის პროცესი გაუმარტივოს.