კობახიძე ფაშინიანს საპარლამენტო არჩევნებში პარტიის წარმატებას ულოცავს

ირაკლი კობახიძე სომხეთის პრემიერ-მინისტრ ნიკოლ ფაშინიანს საპარლამენტო არჩევნებში მისი პარტიის წარმატებას ულოცავს.

კობახიძე სოციალურ ქსელ X-ში გამოქვეყნებულ პოსტში მზადყოფნას გამოთქვამს ორ ქვეყანას შორის მეგობრული ურთიერთობების შემდგომი გაღრმავებისთვის.

„გულწრფელად ვულოცავ სომხეთის რესპუბლიკის პრემიერ-მინისტრ ნიკოლ ფაშინიანს არჩევნებში მისი პარტიის წარმატებას. მოუთმენლად ველი ჩვენი მჭიდრო თანამშრომლობის გაგრძელებას, რათა გავაძლიეროთ სტრატეგიული პარტნიორობა და მეგობრული ურთიერთობები საქართველოსა და სომხეთს შორის, ჩვენი ერების საკეთილდღეოდ“, - აღნიშნავს ირაკლი კობახიძე.

სომხური მედიის ინფორმაციით, ამ დროისთვის სომხეთში არსებული 2 005 საარჩევნო უბნიდან მხოლოდ 82 უბნის მონაცემებია დათვლილი.

მიუხედავად იმისა, რომ ოფიციალური საბოლოო შედეგები ჯერ ცნობილი არ არის, სომხეთის მმართველი პარტიის, „სამოქალაქო კონტრაქტის“ მიერ ჩატარებული ეგზიტპოლის მიხედვით, ნიკოლ ფაშინიანის გუნდი არჩევნებში ხმების 56.7%-ით იმარჯვებს.

ამავე ეგზიტპოლის თანახმად, მეორე ადგილზეა ბიზნესმენ სამველ კარაპეტიანის პრორუსული ოპოზიციური პარტია „ძლიერი სომხეთი“, რომელსაც ამომრჩეველთა ხმების 17.5% აქვს.