კობახიძე საფრთხის წინაშეა - შექმნა სისტემა, რომელიც ხვალ მას წირვას გამოუყვანს… ასე იყო ღარიბაშვილიც|მოსაზრება

თვითმმართველობის საკითხების სპეციალისტ ირაკლი მელაშვილის შეფასებით, საქართველოში პოლიტიკოსები თავად ქმნიან მანკიერ სისტემას, რომელიც საბოლოოდ, მის შემქმნელებს აზიანებს.

“ირაკლი კობახიძე საფრთხის წინაშეა და ამის საფუძველი თავადაა - შექმნა სისტემა, რომელიც ხვალ მას წირვას გამოუყვანს… ასე იყო ირაკლი ღარიბაშვილიც”, - თქვა ექსპერტმა BMGTV-ის გადაცემა “წერტილთან” ინტერვიუში, სადაც მმართველი გუნდის შიგნით მიმდინარე პროცესები შეაფასა და პოლიტიკოსთა ანგარიშვალდებულების პრობლემაზე ისაუბრა.

"ხელისუფლებაში რომ ხარ, ისეთი სისტემა უნდა შექმნა, რომელიც მერე შენვე არ შეგიქმნის საფრთხეს" - ამბობს ის.

ირაკლი მელაშვილი აღნიშნავს, რომ ქართველი პოლიტიკოსები წლების განმავლობაში ვერ სწავლობენ მთავარ გაკვეთილს - ძალაუფლების დროებითობასა და იმ ავტორიტარული მეთოდების ბუმერანგისებურ ეფექტებზე, რომელსაც თავადვე ამკვიდრებენ.

„ვერავინ ჭკუა ვერ ისწავლა ამ ქვეყანაში. თუნდაც ირაკლი ღარიბაშვილი, ხომ?! გახსოვთ, წინა ხელისუფლების დროს ზურაბ ადეიშვილი და სხვები როგორ დადიოდნენ?! - ცა ქუდად არ მიაჩნდათ და დედამიწა - ქალამნად. ასე იყო ბატონი მამუკა მდინარაძე - სულ რამდენიმე დღის წინ რა ტონით ესაუბრებოდა ის ჟურნალისტებს ან რა ტონალობით მიმართავდა საზოგადოებას?! იცით, რა ვერ გავიგე ამ 30 წლის განმავლობაში?! - ეს ახალგაზრდა ხალხი რამდენიმე წელი თანამდებობაზე ყოფნის გულისთვის რატომ იქცევა ასე?! რატომ ვერ სწავლობენ ერთ მარტივ რაღაცას: თუ არ გინდა იგივე დღეში ჩავარდე, რა დღეშიც დღეს ირაკლი ღარიბაშვილია, ხელისუფლებაში ყოფნისას ისე მოიქეცი და ისეთი სისტემა შექმენი, რომელიც მერე შენვე არ შეგიქმნის საფრთხეს!“, - განაცხადა ირაკლი მელაშვილმა და იქვე დასძინა, რომ ირაკლი კობახიძეც იმავე საფრთხის წინაშე დგას.

“ირაკლი კობახიძე საფრთხის წინაშეა და ამ საფრთხის მიზეზი თავადაა, იმიტომ რომ შექმნა სისტემა, რომელიც ხვალ მასვე გამოუყვანს წირვას. მამუკა მდინარაძეს რაც დაემართა, სწორედ იმის შედეგია, რასაც თავად ქმნიდა და ემსახურებოდა. ამ კაცის ყველა სიტყვა ტყუილი იყო... სწორედ მამუკა მდინარაძე გამოვიდა და გვითხრა, კანონს უკან აღარ შემოვაბრუნებთო, მერე კი თავისივე სიტყვები უკან წაიღო. ხან ამბობდა, “ამერიკული კანონი” მივიღეთო, მერე აღმოჩნდა, რომ სულ სხვა კანონი მიიღეს... ყველაფერზე წამსვლელი იყო. როგორც პიროვნება, უბრალოდ განულდა. ასე რომ, მამუკა მდინარაძე პოლიტიკიდან რომ წავიდა, არც არაფერი შეცვლილა”, - თქვა თვითმმართველობის საკითხების სპეციალისტმა.

შეგახსენებთ: 27 აგვისტოს მამუკა მდინარაძემ განაცხადა, რომ პოლიტიკიდან მიდის. რამდენიმე დღეში კი, ცნობილი გახდა, რომ აღარ შეიქმნება რეგიონული პოლიტიკის საკითხებში სახელმწიფო მინისტრის პოსტი, რომელიც მამუკა მდინარაძეს უნდა დაეკავებინა. შარშან გაზაფხულზე შექმნილი რეგიონული განვითარების სამინისტროც უქმდება და ისევ, ინფრასტრუქტურის სამინისტროს ნაწილი ხდება.